कोकणची भजन संस्कृती वृद्धिंगत करा

swt208.jpg
65047
मातोंडः जिल्हास्तरीय भजन स्पर्धेचे दीपप्रज्वलनाने उद्घाटन करताना जिल्हा बँक अध्यक्ष मनीष दळवी.

swt209.jpg
65048
मातोंड ः प्रथम क्रमांक प्राप्त मळगाव श्री देव समाधीपुरुष भजन मंडळाला बक्षीस प्रदान करताना परीक्षक वैभव परब व मान्यवर.

कोकणची भजन संस्कृती वृद्धिंगत करा
मनीष दळवीः मातोंड येथील स्पर्धेत ''मळगाव महापुरुष'' प्रथम
सकाळ वृत्तसेवा
वेंगुर्ले, ता. २० ः इसोटी मंडळाने उत्‍कृष्‍ट नियोजन करून भजन स्‍पर्धेचे आयोजन केले. कोकणची भजनी संस्‍कृती नव्‍या पिढीकडे संक्रमित करण्‍यासाठी मंडळाने राबविलेला हा उपक्रम स्‍तुत्‍य आहे. मंडळाच्‍या सर्व उपक्रमांस सदैव सहकार्य असेल. भजन स्पर्धेबरोबरच मंडळाच्या माध्‍यमातून अनेक लोकोपयोगी उपक्रम राबवण्यात यावेत. त्‍यासाठी माझे पूर्ण सहकार्य असेल, असे प्रतिपादन सिंधुदुर्ग जिल्‍हा बँकेचे अध्‍यक्ष मनीष दळवी यांनी मातोंड येथे केले.
मातोंड-भरभरेवाडी येथील श्री देव इसोटी मित्रमंडळातर्फे निमंत्रितांच्‍या जिल्‍हास्‍तरीय भजन स्‍पर्धेचे आयोजन करण्‍यात आले होते. एकूण ८ संघांनी यात सहभाग घेतला. भजन स्पर्धेचे उद्‍घाटन दळवी यांच्‍या हस्‍ते करण्‍यात आले. यावेळी मातोंडच्‍या सरपंच मयुरी वडाचेपाटकर, उपसरपंच आनंद परब, ग्रामपंचायत सदस्‍य तथा वेंगुर्ले तालुका पत्रकार समिती अध्यक्ष दीपेश परब, सामाजिक कार्यकर्ते महेंद्र सावंत, माजी उपसरपंच सुभाष सावंत, सामाजिक कार्यकर्ते सुनील परब, ज्येष्ठ मार्गदर्शक नाना भरभरे, राजू परब, काका सावंत, झिलू सावंत तसेच इतर मान्‍यवर उपस्‍थित होते.
या स्‍पर्धेचे प्रथम पारितोषिक श्री देव समाधी पुरुष प्रासादिक भजन मंडळ मळगाव, द्वितीय स्वरधारा प्रासादिक भजन मंडळ तांबोळी व तृतीय श्री मोरेश्वर प्रासादिक भजन मंडळ नेरुर यांनी पटकावले. उत्तेजनार्थ क्रमांकाचे मानकरी चिंतामणी प्रा. भजन मंडळ सुरंगपाणी-वेंगुर्ला यांनी पटकावले. ''गजर भारतमातेचा'' या उत्कृष्ट गजरासाठी बक्षीस सिद्धेश्वर प्रा. भजन मंडळ कोंडुरा या मंडळाला देण्‍यात आले.
वैयक्तिक पारितोषिकांत उत्कृष्ट गायक-अक्षय कांबळी (श्री स्वामी समर्थ शेर्ले), उत्कृष्ट हार्मोनियम-भाविक मेस्त्री (रामकृष्ण हरी महिला भजन सेवा तेंडोली), पखवाज वादक-प्रणव मेस्त्री (श्री मोरेश्वर प्रासादिक भजन मंडळ, नेरुर), उत्कृष्ट तबलावादक महंत नेमण (स्वरधारा तांबोळी), झांज वादक-नवनीत मठकर (स्वरसंगीत प्रासादिक भजन मंडळ, हरिचरणगिरी), उत्कृष्‍ट कोरस-चिंतामणी प्रासादिक भजन मंडळ सुरंगपाणी, शिस्तबद्ध संघ-श्री देव समाधी पुरुष प्रासाजदिक भजन मंडळ मळगाव यांना देण्‍यात आले. स्‍पर्धेचे परीक्षण संगीत अलंकार वैभव परब तसेच पखवाज अलंकार अमेय गावडे यांनी केले. समालोचन प्रथमेश सावंत याने केले.