मालवण शहर २६ तास अंधारात

मालवण शहर २६ तास अंधारात
अवकाळी पावसाचा दणकाः महावितरणचे मोठे नुकसान
सकाळ वृत्तसेवा
मालवण, ता. २१ : सोसाट्याच्या वाऱ्यासह कोसळलेल्या मुसळधार पावसामुळे तालुक्यात ठिकठिकाणी मोठ्या प्रमाणात पडझडीच्या घटना घडल्या. अनेक ठिकाणी वीज खांब कोसळून, तारा तुटून वीजपुरवठा खंडित झाला. यात महावितरणचे नुकसान झाले आहे. मालवण शहर परिसर सुमारे २६ तास अंधारात राहिला. आज दुपारी साडेतीन वाजल्यानंतर वीजपुरवठा पूर्ववत झाला. खंडित वीजपुरवठ्याचा फटका शीतपेय व्यावसायिक, पर्यटन व्यवसायिकांना बसल्याचे दिसून आले.
मंगळवारी (ता. २०) दुपारी अचानक सोसाट्याच्या वाऱ्यासह, ढगांच्या गडगडाटासह शहर परिसरास मुसळधार पावसाने झोडपले. यात शहरातील वीजपुरवठा खंडित झाला. परिणामी याचा मोठा फटका हॉटेल, निवास व्यवस्था, शीतपेय व्यावसायिकांना, मत्स्य व्यावसायिकांना बसला. वीजपुरवठा खंडित असल्याने अनेक पर्यटकांनी रात्रीच आपले रुम सोडल्याने व्यावसायिकांना आर्थिक नुकसानीला सामोरे जावे लागले. अन्य व्यावसायिकांचे हजारो रुपयांचे नुकसान झाले.
वीजपुरवठा सुरळीत करण्याचे काम महावितरणकडून युद्ध पातळीवर सुरू होते. रात्री उशिरापर्यंत तालुक्यातील पेंडूर येथील वीजपुरवठा पूर्ववत करण्यात महावितरणला यश आले; मात्र मालवण शहर परिसर अंधारात राहिला. खंडित वीजपुरवठ्यामुळे नागरिकांना झोपही घेता आली नाही.
मालवण शहर अंधारात असल्याची माहिती मिळताच स्थानिक आमदार नीलेश राणे यांनी महावितरणचे अधिकारी सचिन मेहेत्रे यांच्याशी संपर्क साधत अडचणींची माहिती घेतली. व्यापारी संघाच्या पदाधिकाऱ्यांकडूनही याबाबत पाठपुरावा सुरू होता. देवगड तळेबाजार येथून ३३ केव्ही लाईनद्वारे वीजपुरवठा उपलब्ध करून घेण्यात आला. येथील वीज उपकेंद्रात ११ केव्हीवरून वीज पुरवठा करण्यासाठी प्रयत्न सुरू होते; मात्र केंद्रातील मेन प्लेटवर बाष्प पकडल्याने जनरेटरची आवश्यकता होती.
त्यानुसार आमदार राणे यांनी आवश्यक ते सहकार्य केले. त्यामुळे दुपारी शहर परिसरातील वीजपुरवठा सुरळीत झाला. पहिल्याच पावसात महावितरणचा बोजवारा उडाल्याने नागरिकांकडून तीव्र नाराजी व्यक्त करण्यात आली. तालुक्यात अनेक ठिकाणी पडझडीच्या घटना घडल्या. यात किरकोळ नुकसान झाले. महावितरणचे अनेक विद्युत खांब कोसळून नुकसान झाले.