भोसले इन्स्टिट्यूटमध्ये ''अभियांत्रिकी'' प्रवेश केंद्र

भोसले इन्स्टिट्यूटमध्ये
‘अभियांत्रिकी’ प्रवेश केंद्र
सकाळ वृत्तसेवा
सावंतवाडी, ता. २१ः शैक्षणिक वर्ष २०२५-२६ करिता पदविका अभियांत्रिकीची केंद्रीभूत प्रवेश प्रक्रिया शासनातर्फे सुरू केली आहे. तंत्रशिक्षण विभागाने जारी केलेल्या परिपत्रकानुसार २० मे ते १६ जून या कालावधीत विद्यार्थी ऑनलाईन अर्ज भरू शकतात. यासाठी शासनाने जिल्हानिहाय प्रवेश सुविधा केंद्र सुरू केली असून यशवंतराव भोसले इन्स्टिट्यूट ऑफ टेक्नॉलॉजी, सावंतवाडी येथे एफसी-३४७० या क्रमांकाचे केंद्र उपलब्ध आहे. या ठिकाणी ऑनलाईन अर्ज भरणे, कागदपत्रांची छाननी, तक्रार निवारण, कॅप राऊंड पर्याय निवडणे व समुपदेशन आदी निःशुल्क स्वरुपात उपलब्ध आहेत. राज्यात दहावी, बारावीनंतर व्यावसायिक अभ्यासक्रमासाठी सर्वाधिक प्रवेश अभियांत्रिकीला होतात. दहावी उत्तीर्ण विद्यार्थी प्रथम वर्षासाठी आणि बारावी, आयटीआय उत्तीर्ण विद्यार्थी थेट द्वितीय वर्षासाठी पात्र आहेत. इच्छुक विद्यार्थ्यांनी प्रवेशासाठी लवकरात लवकर नोंदणी करावी, असे आवाहन कॉलेजतर्फे केले आहे.