बुडत्याला ‘जीवन रक्षक यंत्रा’चा आधार

65962

बुडत्याला ‘जीवन रक्षक यंत्रा’चा आधार

नवाबागमध्ये प्रात्यक्षिक; जिल्हाधिकाऱ्यांनी घेतली तंत्रज्ञानाची माहिती

सकाळ वृत्तसेवा
वेंगुर्ले, ता. २४ ः पालकमंत्री नीतेश राणे यांच्या सूचनेनुसार वेंगुर्ले नवाबाग समुद्रकिनारी आपत्ती व्यवस्थापनांतर्गत समुद्रात बुडणाऱ्या व्यक्तीला वाचविणारे दूरनियंत्रित जीवन रक्षक यंत्राचे (‘रिमोट क्राफ्ट फॉर लाईफ सेव्हिंग युनिट) प्रात्यक्षिक जिल्हाधिकारी अनिल पाटील यांच्या उपस्थितीत घेण्यात आले. स्वतः जिल्हाधिकाऱ्यांनाही रिमोटद्वारे या यंत्राची माहिती घेऊन कृतीद्वारे अनुभव प्रात्यक्षिक अनुभवले.
सिंधुदुर्गात समुद्रात पाण्याचा अंदाज न आल्याने नागरिक बुडण्याच्या घटना घडत असतात. बुडणाऱ्या व्यक्तींना मनुष्याचा सहभाग न घेता रिमोटद्वारे वाचविण्याचे यंत्र पुणे येथील एका कंपनीद्वारे बनविले आहे. पालकमंत्री राणे यांनी या यंत्राबाबत प्रात्यक्षिक पाहून सविस्तर माहिती आपल्याला द्यावी, अशी सूचना जिल्हाधिकाऱ्यांना दिली होती. त्यानुसार या कंपनीचे पुणे येथील भूषण चिंचोले यांनी वेंगुर्ले नवाबाग समुद्रात या यंत्राचे प्रात्यक्षिक जिल्हाधिकाऱ्यांना दाखविले. यावेळी जिल्हा बँक अध्यक्ष मनीष दळवी, तहसीलदार ओंकार ओतारी, उभादांडा सरपंच नीलेश चमणकर, मंडल अधिकारी विनायक कोदे, तलाठी सायली आदुर्लेकर, भाजप वेंगुर्ले तालुकाध्यक्ष पप्पू परब, मच्छीमार नेते वसंत तांडेल, पोलिसपाटील, कोतवाल, नागरिक उपस्थित होते. यावेळी रिमोटवर चालणाऱ्या या यंत्राचे प्रात्यक्षिक पाहिल्यानंतर जिल्हाधिकाऱ्यांनी स्वतः सविस्तर माहिती जाणून घेतली.
--------------
काय आहे यंत्राचे महत्त्व?
हे यंत्र समुद्रात दीड किलोमीटरपर्यंत बुडणाऱ्या व्यक्तीपर्यंत जाऊ शकते. एका वेळी तीन व्यक्तींना समुद्राच्या पाण्यावर आपल्यासोबत तरंगत ठेऊ शकते. तसेच एक व्यक्ती बुडत असेल, तर त्या व्यक्तीला तरंगत पकडून किनाऱ्यापर्यंत आणू शकते.