खारेपाटणमध्ये तिरंगा रॅलीस प्रतिसाद

65997

खारेपाटणमध्ये तिरंगा रॅलीस प्रतिसाद

घोषणांनी परिसर दणाणला; नागरिकांसह विद्यार्थ्यांचा सहभाग

सकाळ वृत्तसेवा
तळेरे, ता. २४ : भारतीय सैन्य दलाने ‘ऑपरेशन सिंदूर’च्या माध्यमातून दहशवाद्यांविरोधात लढाई करून आपली ताकद जगाला दाखवून दिली. भारतीय सैनिकांप्रती आदरभाव व कृतज्ञता व्यक्त करण्यासाठी आणि त्यांचे मनोबल वाढविण्याच्या दृष्टीने शुक्रवारी (ता. २३) खारेपाटणवासीयांतर्फे तिरंगा काढण्यात आली. यामध्ये मोठ्या संख्येने नागरिक, विविध पदाधिकारी, शिक्षक, डॉक्टर, विद्यार्थी आणि ज्येष्ठ नागरिक सहभागी झाले.
ही रॅली खारेपाटण हायस्कूल ते बसस्थानकापर्यंत काढण्यात आली. खारेपाटण येथील शेठ नवीनचंद्र मफतलाल विद्यालय येथून या तिरंगा रॅलीला सुरुवात करण्यात आली. यावेळी माजी सरपंच रमाकांत राऊत, खारेपाटण पंचक्रोशी शिक्षण प्रसारक मंडळाचे अध्यक्ष प्रवीण लोकरे, सामाजिक कार्यकर्ते मंगेश गुरव, संतोष पाटणकर, रवींद्र मांजरेकर, खारेपाटण हायस्कूलचे पर्यवेक्षक संतोष राऊत, कनिष्ठ महाविद्यालयाचे प्रा. वसीम सय्यद, लिपिक अनिल करंगुटकर, चिंचवली सरपंच अशोक पाटील, अरुण कर्ले, सुहास राऊत, रामा पांचाळ, डॉ. उमेश बालन, डॉ. बलराज येळकोटे, डॉ. संतोष वडाम, महिला बचतगटाच्या जागृती पोटले, आस्था पाटणकर, सायली तुरळकर, पांडुरंग कोकरे, राकेश राऊत, राजू ठाकूर-देसाई आदी उपस्थित होते.
या रॅलीमध्ये ‘भारतमाता की जय’, ‘वंदे मातरम’ आदी घोषणांनी परिसर दणाणून सोडला. राष्ट्रगीताने या तिरंगा रॅलीची सांगता करण्यात आली. रमाकांत राऊत यांनी आभार मानले.