जिल्ह्यातील अनधिकृत,अनावश्यक होर्डिंग्ज काढा

जिल्ह्यातील अनधिकृत होर्डिंग्ज काढा
पालकमंत्री सामंत ः शहरांचे विद्रुपीकरण थांबवणार
सकाळ वृत्तसेवा
रत्नागिरी, ता. २४ : पर्यटनवाढीसाठी त्रासदायक ठरणाऱ्या आणि शहर विद्रुपीकरण करण्यामध्ये मोठा वाटा असलेली अनधिकृत व अनावश्यक होर्डिंग्ज काढण्याचे आदेश पालकमंत्री उदय सामंत यांनी दिले आहेत.
पर्यटनवाढीसाठी त्यांनी अनेक पर्यटनस्थळे विकसित केली आहेत व काही विकसित होत आहेत. अनधिकृत व अनावश्यक होर्डिंग्ज ही केवळ शहरच विद्रुप करत नाहीत तर पर्यटक वा शहरातील नागरिकांनादेखील त्रासदायक ठरतात. तसेच अशा होर्डिंग्जमुळे मोठ्या अपघातांचासुद्धा फार मोठा धोका संभवतो. या सर्व बाबींचा विचार करून व भविष्यातील रत्नागिरी जिल्ह्याचे व्हिजन डोळ्यासमोर ठेवून पालकमंत्री सामंत यांनी रत्नागिरी शहरासह जिल्ह्यातील सर्व ठिकाणची अनधिकृत व अनावश्यक होर्डिंग काढून टाकण्याच्या सूचना संबंधित अधिकाऱ्यांना दिल्या आहेत. जिल्ह्यामध्ये येऊ घातलेल्या उद्योगांच्या अनुषंगाने जिल्ह्यामध्ये पर्यटकदेखील मोठ्या संख्येने येणार असल्याने पालकमंत्री पर्यटनाच्या बाबतीतदेखील महत्त्वपूर्ण निर्णय घेताना दिसत आहेत.