कणकवलीत प्लास्टिक कचऱ्याचा ढीग

66106

कणकवलीत प्लास्टिक कचऱ्याचा ढीग

परिसरात दुर्गंधी; कारवाई करूनही नागरिक बेफिकीर

सकाळ वृत्तसेवा
कणकवली,ता. २५ ः शहरातील नरडवे रस्त्याकडेला आणि रेल्वे स्टेशनच्या बाजूला कचऱ्याचा ढीग साचत असल्याने दुर्गंधी येत आहे. नगरपंचायतीतर्फे घरोघरी जाऊन कचरा उचलला जात असला तरी सुजाण नागरिक मात्र रस्त्यालगतच कचरा फेकून परिसरात रोगराईला आमंत्रण देत असल्याचे चित्र आहे.
शहरामध्ये सध्या प्लास्टिक पिशव्या आणि प्लास्टिकच्या बॉटल जागोजागी आढळतात. नगरपंचायतीतर्फे जनजागृती करूनही शहरवासीयांमध्ये सुधारणा झालेली दिसून येत नाही. शहरात ठिकठिकाणी प्लास्टिकच्या पिशव्या फेकण्यात येतात. नगरपंचायतीतर्फे ओला आणि सुका कचरा वेगळा करून तो नियमितपणे उचलला जातो. मात्र, कचरा उचलण्याचे वेळापत्रक निश्चित नसल्याने कामावर जाणारे नागरिक रात्रीच्या वेळी नरडवे रस्त्यालगत अशा पद्धतीने कचरा फेकत असल्याचे दिसते.
या कचऱ्यावर मोकाट जनावरे आणि भटकी कुत्री ताव मारताना दिसत आहेत. त्यामुळे या परिसरात दुर्गंधी पसरते. रस्त्यालगत टाकलेल्या प्लास्टिक पिशव्या वाऱ्याने किंवा पावसाळ्यात वाहुन पुन्हा रस्त्यावर येतात. यावर नियंत्रण आणण्यासाठी नगरपंचायतीने कारवाई करण्याची गरज आहे. शहरात अजूनही प्लास्टिकच्या पिशव्या उपलब्ध होतात. या प्लॅस्टिकवर दंडात्मक कारवाई नगरपंचायतीतर्फे होते. मात्र, त्याचा कोणताही परिणाम व्यवसायिकांवर आणि नागरिकांवर झालेला दिसत नाही.