चौपदरीकरण झाले; मात्र सेवारस्त्यांची दुरवस्था

66107

चौपदरीकरण झाले; मात्र सेवारस्त्यांची दुरवस्था

कणकवलीतील स्थिती; जागोजागी खड्डे, अतिक्रमण

सकाळ वृत्तसेवा
कणकवली,ता. २५ ः राष्ट्रीय महामार्गाचे चौपदरीकरण झाले असले तरी शहर परिसरातील सेवारस्ते अजूनही नादुरुस्त आहेत. या रस्त्यावर जागोजागी खड्डे पडू लागले आहेत. पहिल्याच पावसामध्ये पडलेले खड्डे सध्या बुजवले जात आहेत. मात्र, पदपथावरच अतिक्रमण असल्याने पादचाऱ्यांना चालणेही मुश्‍कील बनले आहे.
राष्ट्रीय महामार्गावर मुंबई ते गोवा चौपदरीकरणानंतरही अनेक त्रुटी अजूनही आहेत. या रस्त्यावर जागोजागी खड्डे पडले आहेत. कणकवली शहरातील उड्डानपुलावर अजूनही बॅरेकेड लावलेले आहेत. याचे कारण एस. एम. हायस्कूल परिसरामध्ये उड्डानपुलाचा काही भाग चार वर्षांपूर्वी कोसळला होता. या कोसळलेल्या भागांमध्ये तात्पुरती दुरुस्ती करण्यात आली. काही भाग अजूनही अर्धवट स्थितीत आहे. त्यासाठी बॅरेकेड लावण्यात आले आहेत. रात्रीच्या वेळी हे बॅरॅकेड भरधाव वेगात जाणाऱ्या वाहन चालकांना दिसत नाहीत अशी स्थिती आहे. उड्डानपुलाखाली शहरातून जाणाऱ्या सेवा रस्त्याची दुरवस्था आहे. या रस्त्यावर जागोजागी खड्डे पडले आहेत. पहिल्याच पावसामध्ये हे खड्डे पडल्याचे चित्र वर्षानुवर्षे पाहायला मिळते. या रस्त्याची म्हणावी तशी डागडुजी होत नाही. दरवर्षी केवळ खड्डे बुजवले जातात. मात्र, मागील तीन - चार वर्षांमध्ये डांबरीकरण झाले नाही. तसेच रस्त्यालगतचा पदपथही नादुरुस्त झाला आहे.
------
चौका चौकात पदपथावर दुकाने
शहराच्या मुख्य भागांमध्ये चौका चौकात पदपथावर दुकाने थाटली आहेत. दुकानदारांकडून व्यवसाय आणि त्यांचे साहित्य या पदपथावरच ठेवले जाते. त्यामुळे पादचाऱ्यांना चालणेही कठीण जाते. खड्डे पडल्यामुळे त्यात पाणी साठून नागरिकांच्या अंगावर चिखल उडत आहे. सध्या महामार्गाच्या ठेकेदाराकडून खड्डे बुजवण्यासाठी मातीचा वापर केला जातो. मात्र, हे खड्डे फार काळ टिकणार नाहीत अशी स्थिती आहे. पहिल्याच पावसात महामार्गाच्या या दुरवस्थेचे चित्र नागरिकांना त्रासदायक ठरत आहे.