खेड-खेडमध्ये प्लास्टिक विरोधातील कारवाई थंडावली

प्लास्टिक विरोधातील कारवाई थंडावली
खेड, ता. २५ ः शासनाने प्लास्टिकवर बंदी घातली असली तरी शहरात सर्रासपणे प्लास्टिकचा वापर होत आहे. नगरपालिकेची प्लास्टिक विरोधातील कारवाई थंडावल्याने साऱ्यांचेच फावत असल्याचे दिसत आहे. यामुळे येथे प्लास्टिक बंदीचा पुरता फज्जा उडाला आहे.
शहरातील दुकानांसह विशेषतः मिठाईच्या दुकानांमध्ये सर्रासपणे प्लास्टिक पिशव्याचा वापर सुरू आहे. नगरपालिकेने काही महिन्यांपूर्वीच प्लास्टिक पिशव्याचा वापर करणाऱ्या व्यावसायिकांना दणका देत दंडात्मक कारवाई केली होती. या कारवाईच्या धसक्याने प्लास्टिकचा वापर करणाऱ्या व्यावसायिकांचे धाबे दणाणले होते. मात्र आता ही कारवाई थंडावली आहे. त्यामुळे बाजारपेठेत सर्रासपणे प्लास्टिक पिशव्यांचा वापर केला जात आहे. पावसाळी हंगामाच्या पार्श्वभूमीवर बाजारपेठेत खरेदीसाठी ग्राहकांची झुंबड उडत आहे. याच गर्दीचा फायदा घेत काही व्यावसायिक बिनधास्तपणे ग्राहकांना प्लास्टिक पिशव्या देत असल्याचे निदर्शनास येत आहे.