-साखरप्याच्या प्रवेशद्वारावरच चिखलाचे साम्राज्य

साखरप्याच्या प्रवेशद्वारावरच चिखल
सकाळ वृत्तसेवा
साखरपा, ता. २६ ः मुसळधार पावसामुळे साखरपा गावचे प्रवेशद्वार समजले जाणाऱ्‍या छत्रपती शिवाजी महाराजांच्या पुतळा परिसरात चिखलाचे साम्राज्य पसरले आहे. बुधवारी (ता. २१) दुपारपासून साखरपा पंचक्रोशीत जोरदार पर्जन्यवृष्टी होत आहे. रात्रभर परिसरात पडत असलेला पाऊस सुरूच आहे. त्यामुळे साखरपा गावपरिसरात चिखल झाला आहे. साखरपा गावच्या बाहेरून जात असलेल्या मिऱ्या-नागपूर महामार्गाचे काम अद्याप पूर्ण झालेले नाही. देवरूखला जाणाऱ्‍या मार्गाजवळ अजूनही जेसीबीने रस्ता खणणे सुरू आहे. त्याचप्रमाणे कोंडगाव येथील पेट्रोलपंपाच्या पुढे महामार्गाचे काम पूर्ण झालेले नाही. संकेत हॉटेलपासून कोल्हापूरच्या दिशेने जाणाऱ्‍या महामार्गाचे कामही अपूर्णच आहे. त्यामुळे त्या ठिकाणीही चिखल झाला आहे. छत्रपती शिवाजी महाराजांच्या पुतळ्यासमोर फ्लायओव्हर मंजूर झाल्यामुळे तिथेही जेसीबीने रस्ता खणण्याचे काम सुरू आहे. पावसामुळे त्यालाही फटका बसला असून, सर्वत्र चिखलाचे साम्राज्य पसरले आहे.