आरे-बौध्दवाडी येथे घरावर माड पडून नुकसान

66220

आरे-बौद्धवाडी येथे
घरावर माड पडून नुकसान
सकाळ वृत्तसेवा
देवगड, ता. २५ ः तालुक्याच्या किनारी भागात पावसाचा जोर काहीसा कमी झाला असला तरी ग्रामीण भागात वादळी वाऱ्यासह झालेल्या पावसामुळे नुकसान सुरू आहे. तालुक्यातील आरे बौद्धवाडी येथील एका घरावर शनिवारी रात्रीच्या सुमारास माड पडून त्यामध्ये सुमारे ५० हजारांचे नुकसान झाले. महसूल यंत्रणेने नुकसानीची माहिती घेतली.
गेले काही दिवस तालुक्याच्या किनारी भागाला मॉन्सूनपूर्व पावसाने चांगलेच झोडपून काढले. रात्रीपासून पावसाचा जोर काहीसा कमी झाला असला तरीही अधूनमधून सुटणारा वादळी वारा नुकसानीस कारणीभूत ठरत आहे. किनारी भागात अवकाळी पावसाच्या सरी बरसत आहेत. आकाशात काळवंडलेले असल्याने केव्हाही जोराचा पाऊस सुरू होईल, अशी शक्यता आहे. वादळी वाऱ्यासह बरसणाऱ्या पावसामुळे तालुक्यातील आरे बौद्धवाडी येथील एका घरावर माड कोसळून त्यामध्ये सुमारे ५० हजारांचे नुकसान झाले. नुकसानीची महसूल यंत्रणेने माहिती घेतली. सतत पडणाऱ्‍या पावसामुळे ग्रामीण भागातील नद्यांना पूर आला होता. त्यामुळे काही भागात विकास कामासाठी तयार करण्यात आलेले पर्यायी मार्ग वाहून गेले. पावसामुळे देवगड जामसंडे शहरासह ग्रामीण भागातील विद्युतपुरवठा वारंवार खंडित होत असतो. त्यामुळे नागरिकांना अडचणींना सामोरे जावे लागत असल्याचे चित्र आहे.