माणगाव सरस्वती विद्यालय संस्थेची शनिवारी त्रैवार्षिक निवडणूक

माणगाव सरस्वती विद्यालय संस्थेची
शनिवारी त्रैवार्षिक निवडणूक
कुडाळ, ता. २६ः माणगाव पंचक्रोशी शिक्षण प्रसारक मंडळ माणगाव संचलित श्री वासुदेवानंद सरस्वती विद्यालय माणगाव या विद्यालयाच्या संस्थेची त्रैवार्षिक निवडणूक शनिवारी (ता.३१) होत आहे. विद्यमान अध्यक्ष आणि माजी बांधकाम सभापती असलेल्या सगुण धुरी यांच्या श्री स्वामी समर्थ शैक्षणिक विकास पॅनलशी थेट लढत विद्यमान संचालक चंद्रशेखर जोशी यांच्या पॅनलशी तसेच बाळा आगलावे, विजय पालकर, जोसेफ डोन्टस विनोद चव्हाण, पांडू सावंत, एकनाथ केसरकर यांच्या श्री.वासुदेवानंद सरस्वती परिवर्तन पॅनलशी होत आहे. या तिरंगी लढतीबरोबर दोन अपक्षांनी शड्डू ठोकला असून संस्थेच्या इतिहासात पहिल्यांदाच रंगतदार निवडणूक पार पडत आहे.
माणगाव हायस्कूलच्या आतापर्यंतच्या इतिहासाच्या काळात माणगाव शिक्षण प्रसारक मंडळाची गेली कित्येक वर्षे बिनविरोध निवड झाली होती. मात्र, पी. टी. आर मिळण्याच्या दृष्टीने धर्मादाय आयुक्त यांनी थेट निवडणूक घेण्याचे आदेश दिल्यानंतर त्यांच्या आदेशानुसार ही निवडणूक संस्थेच्या इतिहासात पहिल्यांदाच होत आहे. ९ जांगासाठी तीन पॅनल आणि दोन अपक्ष मिळून एकूण २९ उमेदवार रिंगणात आहेत. शनिवारी श्री वा. स. विद्यालय, माणगांव येथील मतदान केंद्रांवर सकाळी आठ ते पाच यावेळेत मतदान होणार असून लगेचच सहानंतर मतमोजणी होणार आहे.