वाळू, चिरा साठ्यावर कारवाई करावी

वाळू, चिरासाठ्यावर कारवाई करा
सुरेश भायजे ः पर्यावरणप्रेमी जिल्हाधिकाऱ्यांना भेटणार
सकाळ वृत्तसेवा
संगमेश्वर, ता. २६ ः पावसाळा सुरू होणार, याचा गैरफायदा घेत काळ्या बाजाराने विकून अधिक पैसे कमवण्याच्या उद्देशाने वाळूमाफिया आणि चिरेखाण व्यावसायिकांकडून मोठ्या प्रमाणावर बेकायदा वाळू आणि चिरे दगड याचा साठा करण्यात आला आहे. महसूल प्रशासनाने यावर कारवाई करावी यासाठी पर्यावरणप्रेमींचे शिष्टमंडळ जिल्हाधिकारी यांना भेटणार असल्याची माहिती बहुजन विकास आघाडीचे अध्यक्ष, सामाजिक कार्यकर्ते सुरेश भायजे यांनी सांगितले.
महसूल खात्याचे सर्व कायदे नियम धाब्यावर बसवत गौण खनिजाचा साठा करण्यात आला आहे. महसूलचे अधिकारी हे उघड्या डोळ्याने बघत आहेत. यासाठी शासनाची लाखो रुपयांची रॉयल्टी चुकवण्यात येत आहे. माखजन करजुवे परिसरातील खाडीत व परिसरात गौणखनिज मोठ्या प्रमाणावर उत्तखनन होत असल्याच्या गेल्या दोन-तीन महिन्यांपासून तक्रारी असताना प्रशासन कोणतीच कारवाई करत नव्हता. आता पावसाळा सुरू होत असताना काहींनी वाळू आणि चिरे दगड याचा बेकायदेशीरपणे साठा केला जात आहे.
माखजन, सरंद, धामापूर येथे गौण खनिजाचा साठा मोठ्या प्रमाणावर करण्यात आला आहे. यासाठी जमीन बिनशेती करण्यात आलेली नाही. पावसाळ्यात वाळू आणि चिरे दगड बांधकामासाठी सहज उपलब्ध होत नाही. याच संधीचा फायदा घेण्यासाठी तसेच गरिबांची आर्थिक लूट करण्यासाठी गौण खनिजाचा बेकायदेशीर साठा मोठ्या प्रमाणावर करण्यात येत आहे. यांच्यावर तत्काळ कारवाई करण्यात यावी, अशी मागणी भायजे यांनी केली आहे.