धोंडू पणशीकर यांना बांदा येथे श्रध्दांजली

66561

धोंडू पणशीकर यांना
बांदा येथे श्रद्धांजली

सकाळ वृत्तसेवा
बांदा, ता. २७ ः शिक्षण प्रसारक मंडळाचे सहसचिव (कै.) डी. एस. पणशीकर यांना बांदा गोगटे वाळके महाविद्यालयात श्रद्धांजली वाहण्यात आली. शैक्षणिक क्षेत्रामध्ये निगर्वीपणे सक्षम काम करत एक आदर्श शिक्षक, मुख्याध्यापक आणि आदर्श नागरिक ही जीवनशैली पणशीकर यांनी आयुष्याभर जोपासली.
जीवनात शिस्त व अध्यात्मिक वारसा जतन करण्याची मनोभूमिका त्यांच्याकडे होती. त्यांनी आयुष्यभर सेवाभावी वृत्ती जोपासली. अनेक विद्यार्थ्यांना घडविण्यात त्यांचा सिंहाचा वाटा आहे. डॉ. बी. बी. गायतोंडे यांच्या समवेत गोगटे-वाळके महाविद्यालयाची मुहूर्तमेढ रोवण्यात व महाविद्यालयाला उर्जितावस्था देण्यात पणशीकरांचे मोठे योगदान आहे. अनेक उपक्रमांतून व स्वतःच्या व्यक्तिमत्त्वातून आदर्श मूल्यांची जोपासना करणारे पणशीकर हे समाजासाठी एक आदर्श होते. त्यांच्या विचारांचा आणि कृतीचा वारसा पुढे चालू ठेवणे हीच त्यांना खरी आदरांजली ठरेल, असे प्रतिपादन शिक्षण प्रसारक मंडळ बांदाचे सचिव एस. आर. सावंत यांनी केले. शिक्षण प्रसारक मंडळ बांदाचे सहसचिव धोंडू पणशीकर यांचे नुकतेच निधन झाले. त्यांना शिक्षण प्रसारक मंडळ बांदा व गोगटे-वाळके कॉलेज, बांदाच्या वतीने श्रद्धांजली वाहण्यासाठी महाविद्यालयात शोकसभेचे आयोजन करण्यात आले. प्रा. डॉ. गोविंद काजरेकर यांनी त्यांच्या व्यक्तिमत्त्वाचे अनेक पैलू उलगडले. सुप्रिया नातू, प्रा. डॉ. रमाकांत गावडे, प्रा. डॉ. एम. एन. वालावलकर, प्रा. डॉ. एन. डी. कार्वेकर आदींनी श्रद्धांजली वाहिली.