शमिता तळवणेकरचा किनळे येथे सत्कार

66564

शमिता तळवणेकरचा
किनळे येथे सत्कार

सकाळ वृत्तसेवा
बांदा, ता. २७ ः रेडी येथील मातोश्री पार्वती राऊत विद्यालयाची विद्यार्थिनी शमिता तळवणेकर हिने दहावी परीक्षेत ९९ टक्के गुण मिळवून वेंगुर्ले तालुक्यातून प्रथम क्रमांक पटकावला. या यशाबाबत किनळे गावाच्या वतीने सरपंच दीपक नाईक यांनी तिचा सत्कार केला.
किनळेसारख्या गावातून एका सर्वसामान्य कुटुंबातील शमिता हिने आपल्या आई-वडिलांच्या प्रेरणेतून व शिक्षकांच्या मार्गदर्शनाखाली दहावीच्या परीक्षेत उल्लेखनीय यश प्राप्त केले. किनळे येथून सुमारे पंधरा किलोमीटर अंतरावर असलेल्या विद्यालयात जाऊन तिने दहावी अभ्यासक्रमाचे नियोजन करून अभ्यास केला. तिला शिक्षकांचे योग्य मार्गदर्शन व आई प्राजक्ता व वडील प्रशांत तळवणेकर यांची प्रेरणा मिळाली. या देदीप्यमान यशाने गावाची शान वाढविल्याबद्दल किनळे सरपंच नाईक यांनी शमिता हिचा सन्मान केला व पुढील वाटचालीस शुभेच्छा दिल्या. शमिताने मिळविलेले हे यश इतर विद्यार्थ्यांसाठी प्रेरणादायक असून प्रत्येक मुलांनी नियोजनपूर्वक अभ्यास केल्यास यश निश्चित संपादन करता येते, असे त्यांनी सांगितले.