गटशिक्षणाधिकारीपदाचा कार्यभार त्रिभुवणेंकडे

स्वप्ना यादव यांना प्रेरणा पुरस्कार
चिपळूण ः भारतीय जनता पक्षाच्या रत्नागिरी महिला मोर्चा चिपळूणच्या वतीने राजमाता पुण्यश्लोक अहिल्यादेवी होळकर त्रिशताब्दी जन्मसोहळ्यानिमित्त महिला प्रेरणा सन्मान पुरस्कार चिपळूण नागरी सहकारी पतसंस्थेच्या सीईओ, वाशिष्ठी डेअरीच्या प्रवर्तक स्वप्ना यादव यांना ब्राह्मण सहाय्यक संघ येथे प्रदान केला. यावेळी भाजपा जिल्हाध्यक्ष राजेश सावंत, सतीश मोरे, विनोद म्हस्के, महिला जिल्हाध्यक्षा वर्षा ढेकणे, चित्रा चव्हाण, स्नेहा मेस्त्री, इतिहासकार ज्योती तोरसकर, शीतल रानडे, सारिका भावे, प्रणाली सावर्डेकर उपस्थित होत्या.

गटशिक्षणाधिकारीपदाचा कार्यभार त्रिभुवणेंकडे
सावर्डे ः संगमेश्वर पंचायत समितीच्या गटशिक्षणाधिकारी पदाचा अतिरिक्त कार्यभार शशिकांत त्रिभुवणे यांच्याकडे दिला आहे. विस्तार अधिकारी प्रदीप पाटील यांच्याकडे गटशिक्षणाधिकारी पदाचा अतिरिक्त कार्यभार होता; परंतु त्यांनी आईचे आजारपण व कौटुंबिक अडचणीमुळे या पदावर काम करण्यास असमर्थता दर्शवली होती. त्यांची विनंती मान्य करून मुख्य कार्यकारी अधिकारी परिक्षित यादव यांनी पाटील यांच्याकडील गटशिक्षणाधिकारीपदाचा कार्यभार कमी करून तो त्रिभुवणे यांच्याकडे दिला आहे. त्रिभुवणे यांच्याकडे कोळंबे प्रभागाचे शिक्षणविस्तार आधिकारी पदही आहे. ते पंचायत समितीमध्ये शिक्षण विभागात पंधरा वर्षांहून आधिक काळ शिक्षणविस्तार अधिकारी म्हणून काम पाहात आहेत.