वजन, मापे विक्रेत्यांचे मंगळवारी स्नेहसंमेलन

वजन, मापे विक्रेत्यांचे
मंगळवारी स्नेहसंमेलन
कुडाळः शासनमान्य वजने मापे उत्पादक विक्रेते व दुरुस्तक परवानाधारक संघटनेतर्फे कोकण विभागातील वजन माप उत्पादक दुरुस्तक व विक्रेते यांचे स्नेहसंमेलन व कार्यशाळेचे आयोजन मंगळवारी (ता. ३) संस्मरण बेंकट हॉल, नील एन्क्लेव्ह, खांदा कॉलनी, पनवेल (जि. रायगड) येथे सकाळी १० ते सायंकाळी ४ या वेळेत केले आहे. स्नेहसंमेलनास कोकण विभागातील ठाणे, पालघर, रायगड, रत्नागिरी व सिंधुदुर्ग या जिल्ह्यांतील वजन माप परवानाधारकांसह महाराष्ट्रातील संघटनेचे वरिष्ठ पदाधिकारी उपस्थित राहणार आहेत. या कार्यशाळेत महाराष्ट्र शासनाचा वैधमापन शास्त्र विभाग सहभागी होणार आहे. प्रमुख पाहुणे व वक्ते शिवाजी काकडे (सहनियंत्रक वैध मापनशास्त्र, कोकण विभाग) यांच्यासह कोकण विभागातील सर्व जिल्ह्यांचे उपनियंत्रक उपस्थित राहणार आहेत. शासनाच्या व वैधमापन शास्त्र विभागाचे धोरण, व्यवसाय सुलभता, ऑनलाईन कार्यप्रणाली तसेच वैध मापन शास्त्र, महाराष्ट्र वैध मापनशास्त्र अंमलबजावणी नियम याविषयी मार्गदर्शन करण्यात येणार आहे. या कार्यक्रमाचा कोकणातील वजन माप परवानाधारकांनी लाभ घ्यावा, असे आवाहन सहसचिव संतोष व्यवहारे यांनी केले आहे.
..................
उद्बोधन वर्गास
कु़डाळात प्रतिसाद
कुडाळः उन्हाळी सुटी कालावधीत बॅ. नाथ पै विद्यालय, कुडाळ येथे उद्बोधन वर्ग झाला. यामध्ये विद्यार्थ्यांना स्कॉलरशिप, बुद्धिमत्ता, विज्ञान, गणित, सुंदर हस्ताक्षर तसेच इंग्लिश स्पीकिंग या विषयांचे मार्गदर्शन करण्यात आले. या उद्बोधन वर्गाला विद्यार्थ्यांनी उत्स्फूर्त प्रतिसाद दर्शविला. यासाठी अक्षरमहर्षी विकास गोवेकर, श्री. नांदोस्कर या शिक्षकांचे मार्गदर्शन लाभले. इंग्लिश स्पीकिंगसाठी शिक्षक पीटर शेरावत यांनी मार्गदर्शन केले. प्रशालेचे शिक्षक श्री. सुर्वे, श्री. गावडे, श्री. मठकर, श्रीमती कोकरे, श्रीमती पावसकर यांनी स्कॉलरशिप परीक्षेसाठी बुद्धिमत्ता, भाषा विषयांचे मार्गदर्शन केले. बॅ. नाथ पै विद्यालयात विविध उपक्रम राबविले जातात. प्रशालेचे विद्यार्थी विविध खेळ, उपक्रम, स्पर्धा परीक्षा यामध्ये प्रशालेचे नाव उंचावत असतात. त्यामुळे बॅ. नाथ पै विद्यालय जिल्ह्यात नावारुपाला आलेले आहे. मंगळवारी (ता. २७) या उद्बोधन वर्गाचा समारोप करण्यात आला.
.......................