राजापूर-सागवे विभागात विजेचा खेळखंडोबा

rat30p11.jpg
67134
राजापूरः आमदार किरण सामंत यांना निवेदन देताना अ‍ॅड. शशिकांत सुतार, सोनाली ठुकरूल यांसह सागवे विभागातील ग्रामस्थ.
------------
सागवे विभागात विजेचा खेळखंडोबा
राजापूर, ता. ३०ः तालुक्यातील सागवे विभागामध्ये गेल्या दहा-पंधरा दिवसांमध्ये विजेचा खेळखंडोबा सुरू आहे. त्यामुळे सर्वसामान्य हैराण झाले असून योग्य त्या उपाययोजना करून विजेचा खेळखंडोबा तत्काळ थांबवावा अन्यथा, वीजभरणा केला जाणार नसल्याचा इशारा सागवे विभागाच्या वतीने महावितरण विभागाला देण्यात आला आहे. याबाबतचे निवेदन सागवे सागवे ग्रामपंचायतीच्या वतीने आमदार किरण सामंत आणि महावितरण विभाग यांना दिले आहे.
आमदार सामंत यांना निवेदन देताना अ‍ॅड. शशिकांत सुतार, सागवेच्या सरपंच सोनाली ठुकरूल, शिवसेना शाखाप्रमुख प्रकाश पारकर, सामाजिक कार्यकर्ते रोहन पुरळकर, गोठीवरेचे पोलिसपाटील नीलेश हळदणकर आदी उपस्थित होते. गेल्या दहा-पंधरा दिवसांपासून मान्सून पावसाने धुमाकूळ घातला आहे. त्यामध्ये सागवे विभागासह तालुक्याच्या अन्य विभागांमध्ये सातत्याने वीजपुरवठा खंडीत होण्याचे प्रकार घडत आहेत. सागवे विभागातील अनेक गावे अंधारात होती. त्यामुळे सागवे विभागातील ग्रामस्थ त्रस्त झाले होते. मे महिन्यातील पावसामुळेच अशी स्थिती असेल तर पुढील तीन महिन्यात महावितरण काय सुधारणा करणार, असा प्रश्न उपस्थित करण्यात आला आहे.
वीजपुरवठा सुरळीतपणे करण्यासाठी योग्य त्या उपाययोजना व्हाव्यात, अन्यथा वीजबिल भरणा केला जाणार नसल्याचा इशारा निवेदनाद्वारे देण्यात आला आहे. यावेळी झालेल्या चर्चेच्यावेळी आमदार सामंत यांनी महावितरणला सागवे विभागातील तत्काळ समस्या सोडविण्याच्या सूचना दिल्या.