साहित्य प्रेरणा कट्टातर्फे विविध कार्यक्रम

67289

साहित्य प्रेरणा कट्टातर्फे विविध कार्यक्रम

आजगावात नियोजन; व्याख्यान, कथावाचन, काव्यसंमेलनाचा समावेश

सकाळ वृत्तसेवा
सावंतवाडी, ता. ३१ ः आजगाव साहित्य प्रेरणा कट्ट्याचा पंचावन्नावा मासिक कार्यक्रम नुकताच आजगाव येथे झाला. या कार्यक्रमात जून २०२५ ते मे २०२६ पर्यंतच्या मासिक कार्यक्रमांचे नियोजन करण्यात आले.
यंदाच्या मासिक कार्यक्रमांमध्ये सुप्रसिद्ध साहित्यिक (कै.) जयवंत दळवी जन्मशताब्दी सांगता सोहळा, प्रेरणा साहित्य संमेलन, मालवणी साहित्य संमेलन, सुप्रसिद्ध ललित लेखक (कै.) रवींद्र पिंगे यांच्या जन्मशताब्दी प्रीत्यर्थ ‘शब्दांचा जादूगार-रवींद्र पिंगे’ हे साहित्यिक प्रा. गजानन मांद्रेकर (गोवा) यांचे व्याख्यान, ‘साहित्य संगम’ (मांद्रे-गोवा)च्या सदस्यांसमवेत मालवण येथे साहित्यिक सहलीअंतर्गत स्थानिक साहित्यिकांशी वार्तालाप तथा ग्रंथालयास भेट, लेखिका सोनाली परब (गोवा) यांचे कथावाचन, कोजागिरी काव्यसंमेलन, ‘संतांचे गूढ अर्थाचे अभंग’ विष्णूबुवा शेटगांवकर (गोवा) यांचे गायन तथा निरुपणाचा कार्यक्रम होईल.
ऑगस्टमध्ये प्रसिद्ध साहित्यिक जयवंत दळवी यांच्या जन्मशताब्दीची सांगता होत आहे, तर सुप्रसिद्ध ललित लेखक (कै.) रवींद्र पिंगे यांची जन्मशताब्दी गेल्या मार्चमध्ये सुरू झाली आहे. याचे औचित्य साधून ''जन्मशताब्दी: एक सरायला आली, दुसरी सुरू झालीट हा कार्यक्रम ''साहित्य संगम'' च्या संयुक्त विद्यमाने २९ जूनला पालये (गोवा) येथे होईल. या कार्यक्रमात ''जयवंत दळवी समजून घेताना'' या विषयावर पुरुषोत्तम तथा सचिन दळवी व विनय सौदागर बोलणार आहेत तर सुप्रसिद्ध साहित्यिक (कै.) रवींद्र पिंगे यांचे ललित लेखन या विषयावर गजानन मांद्रेकर बोलणार आहेत. याव्यतिरिक्त दोन ''पुस्तकचर्चा'' कार्यक्रमांत सरोज रेडकर, नीलम कांबळे, सोमा गावडे, स्नेहा नारिंगणेकर, शेखर पणशीकर, प्राची पालयेकर, वैभवी राय शिरोडकर व डॉ. गणेश मर्ढेकर हे सदस्य विविध पुस्तकांवर विवेचन करतील. वर्षभराचे मासिक कार्यक्रम शिरोडा येथील खटखटे ग्रंथालय, साळगावकर मंगल कार्यालय, फणसखोल येथील श्रीगणेश मंदिर, आजगाव येथील सदस्य दिलीप पांढरे यांचे निवासस्थान, विनय सौदागर यांचे निवासस्थान तसेच सातार्डा पंचक्रोशी टिळक ग्रंथालय या ठिकाणी आयोजित करण्यात येणार आहेत.
या वार्षिक नियोजन बैठकीस ''साहित्य संगम''चे कार्यवाह प्रा. गजानन मांद्रेकर, समन्वयक विनय सौदागर यांनी मार्गदर्शन केले. खटखटे ग्रंथालयाचे कार्यवाह सचिन गावडे, कार्यकारिणी सदस्य सचिन दळवी, कट्ट्याच्या ज्येष्ठ सदस्य सरोज रेडकर, एकनाथ शेटकर, निवृत्त शिक्षक विनायक उमर्ये, सामाजिक कार्यकर्ते दिलीप पांढरे, लेखिका स्नेहा नारिंगणेकर व पुस्तकप्रेमी जयदीप देशपांडे आदी उपस्थित होते.