चिपळूणात सामाजिक सलोखा समितीची बैठक

अमली पदार्थ विक्रेत्यांची माहिती द्या
राजेंद्रकुमार राजमाने ः चिपळुणात सामाजिक सलोखा समिती
सकाळ वृत्तसेवा
चिपळूण, ता. ३१ ः गावात अमली पदार्थविरोधी मोहिमेंतर्गत नशापान व अमली पदार्थांची विक्री करणाऱ्यांवर लक्ष ठेवून त्याची माहिती पोलिसांना द्यावी. खात्री केल्याशिवाय कोणीही कोणत्याही अफवांवर विश्वास ठेवू नये, अफवांची खातरजमा करावी, असे आवाहन सामाजिक सलोखा समिती बैठकीत उपविभागीय पोलिस अधिकारी राजेंद्रकुमार राजमाने यांनी केले.
जिल्हा पोलिस अधीक्षकांच्या सूचनेनुसार, चिपळूण पोलिस ठाण्यात सामाजिक सलोखा समिती स्थापन करण्यात आली आहे. या समितीची बैठक उपविभागीय पोलिस अधिकारी राजेंद्रकुमार राजमाने, पोलिस निरीक्षक फुलचंद मेंगडे यांच्या अध्यक्षतेखाली बैठक घेण्यात आली. या बैठकीत सदस्यांना काही सूचना देण्यात आल्या. त्यानुसार सर्व धार्मिक सण, उत्सवाचे कोणत्याही समस्या असल्यास त्याबाबात पोलिसांना कळवावे, आगामी बकरी ईद सणाच्या अनुषंगाने शांतता राखण्याचे आवाहन करण्यात आले. गोवंश वाहतूक अथवा गोमांस वाहतूक याबाबत माहिती मिळाल्यास तत्काळ पोलिसांना कळवावे, गोवंश वाहतूक अथवा गोमांस विक्री वाहतूक करताना संशयित आढळून आल्यास त्यांना मारहाण न करता चिपळूण पोलिस ठाण्यात कळवावे. आगामी बकरी ईद सणाच्या अनुषंगाने धार्मिक भावना दुखावतील अथवा सामाजिक तेढ निर्माण होईल, अशी कृती अथवा वक्तव्य करू नये. सोशल मीडियावर कोणतेही आक्षपार्ह विधाने टाकू नयेत. सायबर क्राइमबाबत सतर्क राहावे तसेच ऑनलाईन नवनवीन येणारे क्युआर कोडबाबत सूचना देण्यात आल्या.