ओकटेवाडी, घोसाळकर कोंड रस्त्याची दुरूस्ती सुरू

-rat३१p१.jpg -
२५N६७२७२
संगमेश्वर ः ओकटेवाडी, घोसाळकर कोंड रस्त्याची दुरूस्ती करताना जेसीबी.
---
ओकटेवाडी, घोसाळकर कोंड
रस्त्याच्या दुरूस्तीचे काम सुरू
कडवई ग्रामपंचायतीचे पत्र; पावसामुळे साचला चिखल
सकाळ वृत्तसेवा
संगमेश्वर, ता. ३१ ः संगमेश्वर तालुक्यातील कडवई येथे ओकटेवाडी, घोसाळकर कोंड रस्त्याच्या काँक्रिटीकरणाचे काम सुरू आहे. तिथे अनेक ठिकाणी उत्खनन झाल्यामुळे पावसात चिखल झाला आहे. तेथील रस्ता वाहतुकीस धोकादायक झाला होता. याची दखल घेत ग्रामपंचायतीने संबंधित ठेकेदाराला रस्ता दुरुस्त करण्याचे पत्र दिले होते. त्याची तत्काळ दखल घेत हे काम सुरू केले असून, लवकरच रस्ता वाहतूक सुरळीत केली जाईल असे आश्वासन दिले आहे.
कडवई ओकटेवाडी तसेच घोसाळकर कोंड व सुतारवाडी भागात काँक्रिटीकरणाचे काम सुरू आहे. यासाठी अनेक ठिकाणी कॉजवे तसेच इतर कामासाठी मातीचे उत्खनन करण्यात आले आहे. पावसामुळे चिखल होऊन हा रस्ता अनेक ठिकाणी वाहतुकीस धोकादायक बनला आहे. याबाबत ग्रामस्थांनी ग्रामपंचायतीकडे तक्रारी केल्या. सरपंच विशाखा कुवळेकर व सरपंच दत्ताराम ओकटे यांनी याबाबत कंपनीशी चर्चा केली. दोन दिवसांपूर्वी कंपनीचे प्रकल्प व्यवस्थापक अक्षय बरवल यांना पत्र देऊन तत्काळ रस्ता वाहतुकीस पूर्ववत करण्यास सांगितले होते तसेच काल झालेल्या ग्रामसभेत याबाबत चर्चा झाल्यानंतर बरवल यांना याबाबत कल्पना दिली होती. त्यांनी तत्काळ काम सुरू करत असल्याचे सांगितले. त्यानुसार कामही सुरू केले आहे.