राजापूर ः राजापूर रोड रेल्वे स्थानकावर दोन एक्स्प्रेस थांबवा

rat1p7.jpg -
67449
राजापूर रोड स्थानक

राजापूर रोडवर दोन एक्स्प्रेसना हवा थांबा
केंद्रीय रेल्वेमंत्र्यांकडे मागणी; पंचक्रोशी ग्रामविकास समितीतर्फे निवेदन
सकाळ वृत्तसेवा
राजापूर, ता. ३१ः सोल्ये येथील राजापूर रोड हे रेल्वे स्थानक कोकण रेल्वेमार्गावरील एक महत्त्वाचे स्थानक आहे. तेथून प्रवास करणाऱ्या प्रवाशांची संख्या दिवसेंदिवस वाढत आहे. विशेषतः सणासुदीच्या काळात ये-जा करणाऱ्या मुंबईकर चाकरमान्यांसह प्रवाशांची मोठी संख्या असते. या ठिकाणी थांबा असलेल्या गाड्यांची संख्या मोजकीच असल्यामुळे प्रवाशांची गैरसोय होते. याठिकाणी मडगाव जनशताब्दी एक्स्प्रेस आणि नेत्रावती एक्स्प्रेस या गाड्यांना थांबा मिळावा अशी मागणी पंचक्रोशी ग्रामविकास समितीतर्फे माजी राज्यमंत्री आमदार सदाभाऊ खोत यांच्याकडे केली होती. खोत यांनी या गाड्या सुरू करण्यासाठी केंद्रीय रेल्वेमंत्री अश्विनी वैष्णवी, राज्याचे मुख्यमंत्री देवेंद्र फडणवीस यांच्याकडे केली आहे.
कोकण रेल्वेसाठी अनेक कोकणवासीयांनी आपली जमिन दिली होती. मात्र, कोकण रेल्वेचा प्रत्यक्ष लाभ कोकणातील नागरिकांना अपेक्षित प्रमाणात मिळत नाही. कोकण रेल्वेमार्गावर तालुक्यातील सोल्ये येथील राजापूर रोड रेल्वे स्थानक आहे. कोकण रेल्वेने प्रवास करणाऱ्यांसह या ठिकाणी थांबणाऱ्या प्रवाशांची मोठी संख्या आहे. त्याचवेळी राजापूर रोड हे स्थानक रत्नागिरी व सिंधुदुर्ग जिल्ह्यांतील पर्यटक, स्थानिक ग्रामस्थ, चाकरमानी, आंबा व काजू व्यापार्‍यांसाठी अत्यंत सोयीचे आहे. या ठिकाणी मोजक्या गाड्यांना थांबा आणि प्रवासी आरक्षणाचा कोटाही मर्यादीत असल्यामुळे ये-जा करणाऱ्या प्रवाशांची मोठी गैरसोय होते. त्यामुळे या ठिकाणी अन्य गाड्यांप्रमाणे मडगाव जनशताब्दी एक्स्प्रेस आणि नेत्रावती एक्स्प्रेस या गाड्यांनाही थांबा मिळावा अशी मागणी पंचक्रोशी ग्रामविकास समिती यांच्यावतीने आमदार सदाभाऊ खोत यांच्याकडे निवेदनाद्वारे केली होती. त्यानुसार आमदार श्री. खोत यांनी राज्याचे मुख्यमंत्री श्री. फडणवीस यांच्याशी पत्र व्यवहार केल्यानंतर त्यांनी तात्काळ देशाचे केंद्रीय रेल्वेमंत्री वैष्णवी यांच्याकडे दोन गाड्यांना राजापूर रोड स्थानकावर थांबा द्यावा अशी शिफारस करून आवश्यक कार्यवाही करण्याची विनंती केली. तसेच या दोन्ही गाड्यांचा थांबा मंजूर करण्याकरीता केंद्रीयस्तरावर रेल्वे विभागाशी पंचक्रोशी ग्रामविकास समिती सर्वतोपरी प्रयत्न करेल असे आमदार खोत यांचे खासगी सचिव व पंचक्रोशी ग्रामविकास समितीचे प्रशासकीय समिती प्रमुख आदिनाथ कपाळे यांनी सांगितले.