तीन महिन्याच्या धान्याची उचल त्वरित करा

तीन महिन्यांच्या धान्याची उचल करा
पुरवठा अधिकारी; पावसाळ्यापूर्वी प्रशासनाकडून तयारी
सकाळ वृत्तसेवा
रत्नागिरी, ता. २ ः राष्ट्रीय अन्न सुरक्षा योजनेच्या पात्र लाभार्थ्यांनी जून ते ऑगस्ट २०२५ पर्यंतचे तीन महिन्याच्या अन्नधान्याची उचल रास्त धान्य दुकानांमधून त्वरित करावी, असे आवाहन जिल्हा पुरवठा अधिकारी रोहिणी रजपूत यांनी केले आहे.
राष्ट्रीय अन्न सुरक्षा अधिनियम २०१३ अंतर्गत अन्न, नागरी पुरवठा व ग्राहक संरक्षण विभागामार्फत आगामी पावसाळा आणि परिणामी पूर इत्यादी प्रतिकूल हवामान परिस्थितीमुळे येणाऱ्या अडचणी लक्षात घेता केंद्र शासनाच्या निर्देशानुसार ऑगस्ट २०२५ पर्यंतचे अन्नधान्य पात्र लाभार्थ्याना ३० जून २०२५ पर्यंत रास्त भाव दुकानांमधून वितरित करण्याचा निर्णय शासनाने घेतला आहे. या धान्याची उचल ३१ मे पर्यंत करण्याचे आदेश देण्यात आले आहेत. जिल्ह्यात आतापर्यंत ३१ टक्के धान्य गोदामापर्यंत उचलण्यात आले आहे. त्यामुळे लाभार्थ्यांनी जूनमध्ये हक्काचे तीन महिन्यांचे एकत्रित धान्य रास्त धान्य दुकानातून घेऊन जावे. ९ मे २०२५ च्या शासन निर्णयानुसार पावसाळ्यामुळे अंत्योदय अन्न योजना व प्राधान्य कुटुंब गटातील पात्र लाभार्थ्यांना जून ते ऑगस्ट अशा तीन महिन्यांचे एकत्रित धान्य वितरित करण्याचा निर्णय घेण्यात आला आहे. जिल्हाधिकारी एम. देवेंदर सिंह यांच्या निर्देशानुसार सर्व तहसीलदार कार्यालयातील पुरवठा निरीक्षक, गोदाम व्यवस्थापक, गोदाम पालक, रास्त धान्य दुकानदार यांच्या संघटनेचे जिल्हाध्यक्ष, तालुकाध्यक्ष, ट्रान्स्पोर्ट कंपनीचे प्रतिनिधी, हमाल कामगार संघटनेचे प्रतिनिधी, हमाल ठेकेदार संस्थेचे प्रतिनिधी, हमाल मुकादम या सर्वांसोबत १२ मे रोजी जिल्हा पुरवठा अधिकारी श्रीमती रजपूत यांनी बैठक घेऊन सर्वाना शिस्तबद्धरीत्या काम करून मुदतीत उचल पूर्ण करावी. जेणेकरून एकही लाभार्थी धान्यापासून वंचित राहू नये अशा सूचना दिल्या. या बैठकीत रास्त धान्य दुकान संघटनेचे अशोक कदम यांनी रास्त धान्य दुकानदारांच्या अडचणी मांडल्या व त्याबाबत चर्चा केली.