''रेडिओलॉजी'' सेंटरचे महिलांना आवाहन

‘रेडिओलॉजी’ सेंटरचे
महिलांना आवाहन
सावंतवाडी ः नुकत्याच हैदराबाद येथे १०८ देशांच्या विश्वसुंदरी स्पर्धेत बाजी मारलेली थायलंड येथील विश्वसुंदरी ओपल सुचाता चुआंगश्री हिने स्तनाच्या कर्करोगाबद्दल जागरुकता निर्माण करायची आहे आणि महिलांच्या आरोग्याबाबतही खूप काही करायचे आहे, असे महत्त्वाचे विधान केलेले आहे. सिंधुदुर्ग रेडिओलॉजी सेंटर याबाबतीत आपली सामाजिक जबाबदारी म्हणून यात गांभीर्याने लक्ष घालणार आहे. याबाबत सर्व महिलांनी योग्य काळजी घ्यावी व या सेवेचा लाभ घ्यावा, असे आवाहन डॉ. केतकी यांनी केले आहे.

सावंतवाडी आगारातर्फे
‘एसटी’चा वर्धापन दिन
सावंतवाडी ः एसटी महामंडळाचा ७७ वा वर्धापन दिन रविवारी (ता.१) येथील बसस्थानकात कर्मचारी व प्रवाशांच्या उपस्थितीत साजरा केला. प्रवासी सुप्रिया राऊळ यांच्या हस्ते केक कापण्यात आला. दरवर्षी एसटी महामंडळातर्फे वर्धापन दिन साजरा करण्यात येतो. महामंडळातर्फे १ जून १९४८ ला एसटी महामंडळाची पहिली प्रवासी फेरी पुणे ते अहिल्यानगर या मार्गावर धावली होती. त्याच्या सन्मानार्थ एसटी महामंडळातर्फे १ जून हा वर्धापन दिन म्हणून राज्यातील सर्व बसस्थानकांत साजरा करण्यात येतो. यानिमित्त सावंतवाडी बसस्थानकातही वर्धापन दिन साजरा करण्यात आला. यावेळी आगार व्यवस्थापक नीलेश गावित, स्थानकप्रमुख राजाराम राऊळ, प्रांजल धुरी, रेषा सावंत, वर्कशॉप अधिकारी, वाहक, चालक व इतर कर्मचारी उपस्थित होते.

कसाल ग्रामपंचायतीतर्फे
नीलेश राणेंना निवेदन
कुडाळ ः अचानक पावसाने मेमध्ये हजेरी लावली व शेतकरी बांधवांच्या हातातोंडाशी आलेले काजू आंबे, फणस व कोकम या उत्पन्न देणाऱ्‍या फळपिकांचे मोठे नुकसान झाले. मेमध्ये फळ पिके विकून चार पैसे शेतकऱ्‍यांकडे जमा होतात व त्यातूनच आपल्या घरात लागणारा किरकोळ बाजारहाट या पैशातूनच शेतकरी खरेदी करून ठेवतात; मात्र, अचानक पावसाने हजेरी लावल्याने शेतकरी बांधवांचे मोठ्या प्रमाणावर नुकसान झाले. शासनाकडून भरपाई मिळावी, यासाठी आमदार नीलेश राणे यांच्याकडे कसाल ग्रामपंचायतीमार्फत सरपंच राजन परब यांनी निवेदन दिले.