-शिक्षणाबरोबरच क्रीडा क्षेत्रासाठी काम करायचे आहे

क्रीडा क्षेत्रासाठीही काम करणार
शेखर निकम ः सोळजाई देवस्थानतर्फे गुणवंताचा गौरव
सकाळ वृत्तसेवा
साडवली, ता. ३ : देवरूखमध्ये शिक्षणाच्या चांगल्या सोयीसुविधा मिळत आहेत. शिक्षणाबरोबरच क्रीडाक्षेत्रासाठी आता काम करायचे आहे, असे प्रतिपादन आमदार शेखर निकम यांनी व्यक्त केले.
देवरूखची ग्रामदेवता श्री देवी सोळजाई ग्रामदेवी देवस्थानतर्फे आयोजित दहावी, बारावी गुणवंत विद्यार्थ्यांचा गौरव कार्यक्रमावेळी ते बोलत होते. या प्रसंगी ७५ विद्यार्थ्यांचा गौरव करण्यात आला. ते म्हणाले, देशासाठी कार्य करा, चांगले अधिकारी आता आपल्या तालुक्यातून घडत आहेत. चमकदार कामगिरीसाठी सर्वांनी मुलांना प्रोत्साहन दिले पाहिजे. पालक सक्षम आहेतच; पण आमदार म्हणून आपणही जे लागेल ते सहकार्य करू, असे निकम यांनी सांगितले. नुकतीच लातूरच्या शाहू कॉलेजला भेट दिली. तिथे सायंकाळ झाली तरीही मुले, मुली मिळेल त्या जागेत बसून अभ्यास करत होती. त्यांना न्यायला आलेले पालकही गेटबाहेर शांत बसलेले पाहिले. तसे चित्र आपल्याकडे पाहायला मिळाले पाहिजे, अशी अपेक्षा त्यांनी व्यक्त केली.
या गुणगौरव कार्यक्रमाला रोहन बने, सदानंद भागवत, देवस्थानचे अध्यक्ष बापू गांधी, संतोष लाड, गीते भाऊ, बांडागळे गुरूजी, प्रकाश घस्ते, भाऊ कांगणे, स्मिता लाड, स्नेहल यशवंतराव, बाबू शेट्ये, तुकाराम किर्वे, शांताराम कांगणे, अभिजित शेट्ये, देवस्थानचे पदाधिकारी उपस्थित होते. या प्रसंगी श्री सोळजाई मंदिर देवस्थानची २५ गुंठे जमीन आहे त्या ठिकाणी एक चांगला हॉल व्हावा, असे संतोष लाड यांनी सांगितले.