चांगले काम करणाऱ्या पत्रकाराचा दिल्लीत सन्मान

चांगले काम करणाऱ्या पत्रकाराचा
दिल्लीत सन्मान ः ब्रह्मनाथकर
सकाळ वृत्तसेवा
रत्नागिरी, ता. ३ ः चांगले काम करणाऱ्या पत्रकाराला दिल्लीत नेहमीच सन्मान आहे असे मत अभिजित ब्रह्मनाथकर यांनी मांडले.
विभागीय कोकण माहिती कार्यालय, जिल्हा माहिती कार्यालयाच्यावतीने घेण्यात आलेल्या कोकण विभागातील पत्रकारांसाठी दोनदिवसीय कार्यशाळेत ''दिल्लीतील पत्रकारिता'' या विषयावर ते मार्गदर्शन करत होते. या वेळी माहिती संचालक हेमराज बागुल उपस्थित होते. ब्रह्मनाथकर यांनी त्यांच्या दिल्ली वास्तव्यातील पत्रकारितेतील अनेक आठवणी सांगितल्या. ते म्हणाले, संसदीय पत्रकारितेत सर्वात पहिले पाऊल टाकण्याची संधी मला दिल्लीत मिळाली. घडामोडीच्या वातावरणातील कुठलीही व्यक्ती बातमी देईल, हा मंत्र दिल्लीमध्ये महाराष्ट्रातील पत्रकारमित्राने दिला. दिल्लीतून बातमी आली की, सर्वत्र ती चर्चिली जाते. बऱ्याचवेळा पत्रकारांकडून कधीकधी नेता बातमी मिळवतो आणि राजकारण करतो हे सांगून, तीन नाराज खासदारांची बातमी पत्रकारांकडून मिळवून त्यांना सत्तेत आणल्याचा प्रसंग त्यांनी सांगितला. सध्याच्या यू ट्यूब, व्हॉटस्ॲपच्या माध्यमातून पत्रकारिता सुरू झाली आहे. येणाऱ्या काळात काल्पनिक पत्रकार, काल्पनिक निवेदकाने बातमी दिल्यास नवल वाटायला नको, असेही ते म्हणाले.