चिपळूण-निधी आणि पदावरून महायुतीत संघर्ष

निधी आणि पदावरून
महायुतीत संघर्ष
राणे, सामंत, चव्हाण केंद्रस्थानी; भाजपमध्ये अंतर्गत कुरबुरी
सकाळ वृत्तसेवा
चिपळूण, ता. ३ः कुटुंब वाढले की, वाद वाढतात, प्रत्येकाची महत्वाकांक्षा वाढते, हाच अनुभव सत्ताधारी शिवसेना-भाजपमधील पदाधिकाऱ्यांना येऊ लागला आहे. पक्षातील पदांचे वाटप असो किंवा निधीचा वाटप असो यावरून महायुतीमध्ये संघर्ष पेटू लागला आहे. त्याचे पडसाद खासदार नारायण राणेंच्या दौऱ्यातून उमटले आणि महायुतीमध्ये सर्वकाही आलबेल नाही, असा संदेश राजकीय क्षेत्रात गेला आहे.
खासदार नारायण राणे काँग्रेसमध्ये असताना त्यांनी काँग्रेस वाढवण्याचा प्रयत्न केला; मात्र नेतृत्वाकडून अपेक्षित साथ मिळाली नाही. त्यामुळे राष्ट्रीय पातळीवरील पक्षाला कोकणात राणेंसारखे खमके नेतृत्व मिळवूनही हा पक्ष तालुक्यात फारसा वाढला नाही. त्यांच्या कार्यकर्त्यांना राणे समर्थक अशी ओळख शेवटपर्यंत मिळाली. राणे यांनी भाजपमध्ये प्रवेश केल्यानंतर त्यांनी कोकणात भाजप वाढवण्याचा प्रयत्न केला. रत्नागिरी-सिंधुदुर्ग लोकसभा मतदार संघाची जागा जिंकण्यासाठी त्यांनी पक्षासह स्वतःचे नेटवर्क वापरले. आता पक्ष वाढवत असताना त्यांच्या कार्यकर्त्यांना न्याय मिळावा अशी त्यांची व कार्यकर्त्यांची अपेक्षा आहे; मात्र भाजपमध्येही राणे समर्थकांना काँग्रेससारखीच वागणूक मिळत असल्याची तक्रार त्यांच्या कार्यकर्त्यांनी जाहीर कार्यक्रमात मांडायला सुरवात केली आहे. भाजप शिस्तप्रिय पक्ष म्हणून ओळखला जातो. इतर पक्षातून भाजपमध्ये प्रवेश करणाऱ्यांना कोणतेही पद लगेच दिले जात नाही. असे आजवर सांगितले जात होते; मात्र ठाकरे गटाचे शहरप्रमुख शशिकांत मोदी एकटेच भाजपमध्ये आल्यानंतर त्यांना शहर मंडल अधिकारी म्हणून नेमण्यात आले. त्यामुळे या पदासाठी इच्छुक असलेले राणे समर्थकांसह एकूण १३ कार्यकर्ते नाराज झाले. विशेष म्हणजे शहरप्रमुखपदासाठी इच्छुकांच्या मुलाखतीसुद्धा घेण्यात आल्या नाहीत, अशी खंत राणे समर्थक व्यक्त करत आहेत. चिपळूणमध्ये राणे समर्थकांचे वजन वाढू नये किंवा त्यांना मोकळीक मिळू नये म्हणून भाजपमधील दुसरा गट प्रयत्न करत असल्याची चर्चा सुरू झाल्यानंतर चिपळूण दौऱ्यावर आलेले खासदार राणे यांनी पक्षाचे प्रभारी प्रदेशाध्यक्ष रवींद्र चव्हाण यांचे नाव न घेता त्यांना आव्हान दिले आहे. त्यामुळे आता भाजपमध्ये चव्हाण विरूद्ध राणे असे युद्ध सुरू होणार की, राणे समर्थकांना न्याय मिळून हा वाद संपणार याची सर्वांना उत्सुकता आहे.

चौकट
वाद उफाळून येण्याची शक्यता
महायुतीतील घटक पक्ष असलेल्या शिवसेना आणि राष्ट्रवादीमध्ये रायगड जिल्ह्यात वादाची ठिणगी पडली असताना रत्नागिरी जिल्ह्यात भाजप आणि शिवसेनेत वाद उफाळून येण्याची शक्यता आहे. कारण, रत्नागिरी जिल्ह्याचे पालकमंत्री भाजप कार्यकर्त्यांना निधी देत नाही, अशी तक्रार भाजप कार्यकर्त्यांनी खासदार नारायण राणेंकडे केली आहे. खासदार राणेंनी तूर्तास या विषयावर भाष्य केलेले नाही; मात्र राणेंनी कार्यकर्त्यांना आत्मपरीक्षण करण्याचा सल्ला दिला आहे. पक्ष वाढवण्याचा आणि त्यातून ओळख निर्माण करण्याचा सल्ला दिला आहे. त्यामुळे शिवसेना विरूद्ध भाजप तिढा वाढेल की, राणे कार्यकर्त्यांच्या तक्रारींकडे दुर्लक्ष करतील याकडे सर्वांचे लक्ष लागले आहे.

चौकट
भाजपच्या चौकटीत राहून कामः मोदी
शिवसेनेतून भाजपमध्ये आल्यानंतर शशिकांत मोदी यांना शहराध्यक्षपद मिळाले. पक्षाच्या या कृतीबद्दल भाजप कार्यकर्त्यांनी खासदार नारायण राणेंकडे नाराजी व्यक्त केली. या संदर्भात शहरप्रमुख शशिकांत मोदी यांच्याशी संपर्क केला असता मला कोणतीही प्रतिक्रिया द्यायची नाही. काम करायचे आहे, असे सांगून भाजपच्या चौकटीत राहून काम करण्याचे संकेत दिले आहेत.