सिंधुदुर्ग जिल्ह्यात ४१५८.४० क्विंटल भात बियाणे विक्री

सिंधुदुर्ग जिल्ह्यात ४१५८.४०
क्विंटल भात बियाणे विक्री

सचिन कांबळे ः १४२० टन खतांची उचल

सकाळ वृत्तसेवा
सिंधुदुर्गनगरी, ता. ३ ः खरीप हंगाम २०२५-२६ साठी जिल्ह्यात भात बियाणे व खत मोठ्या प्रमाणात प्राप्त झाले आहे. आतापर्यंत ४१५८.४० क्विंटल भात बियाण्यांची विक्री झाली असून, १४२० मेट्रिक टन खताची विक्री झाल्याची माहिती जिल्हा परिषद कृषी विकास अधिकारी सचिन कांबळे यांनी दिली.
सिंधुदुर्ग जिल्ह्यात यावर्षी मॉन्सूनपूर्व पावसाला १७ मे पासून सुरुवात झाली. आतापर्यंत पावसाची संततधार सुरूच आहे. यावर्षी पावसाला लवकर सुरुवात झाल्याने शेतकऱ्यांची धावपळ उडाली. मशागत केलेल्या जमिनीमध्ये पाणी साचल्याने भात बियाणे पेरणी करता आली नाही; मात्र आता पावसाचे प्रमाण काही प्रमाणात कमी झाल्याने भात पेरणी सुरू झाली आहे. त्यामुळे शेतकऱ्यांकडून भात बियाणे खरेदी केली जात आहेत. जिल्ह्यात खरीप हंगाम २०२५-२६ मध्ये ५६ हजार २९५ हेक्टर क्षेत्रांवर भात लागवडीचे उद्दिष्ट ठेवले आहे. त्यासाठी सुधारित व संकरित भात बियाणे उपलब्ध केले आहेत. आतापर्यंत संकरित ८९ क्विंटल व सुधारित ७०१५.६५ क्विंटल असे एकूण ७१३८.६५ क्विंटल बियाणे प्राप्त झाले आहे. पैकी ४०६४.२० क्विंटल सुधारित भात बियाणे व संकरित ८९, असे एकूण ४१५८.४० क्विंटल भात बियाण्याची २ जूनअखेर विक्री झाली आहे. सध्या पावसाचा जोर कमी झाल्याने पेरणीच्या कामाला जोर आला आहे.
....................
१४२० टन खतांची विक्री
जिल्ह्यात उपलब्ध झालेल्या ४८५४.७७ मेट्रिक टन खत साठ्यापैकी आतापर्यंत १४२० मे टन खताची विक्री झाली असून, अद्यापही ३४३५.५४ मेट्रिक टन खताचा साठा उपलब्ध आहे. शेतकऱ्यांना शेतीसाठी आवश्यक असलेल्या खताचा तुटवडा भासू नये, याबाबतचे नियोजन जिल्हा परिषद कृषी विभागाने केले आहे. पुरवठा केलेल्या रासायनिक खतांच्या विविध प्रकारामध्ये युरिया, डीएपी, एमओपी, संयुक्त खते, एस.एस.पी. आदी खतांचा समावेश असून शेतकऱ्यांनी आवश्यक असलेल्या खताची व बियाण्याची खरेदी जवळच्या अधिकृत खरेदी-विक्री केंद्रातून करावी, असे आवाहन कृषी विकास अधिकारी कांबळे यांनी केले आहे.