पावसाने दडी मारल्याने देवगडात शेतकरी चिंतेत

पावसाने दडी मारल्याने
देवगडात शेतकरी चिंतेत

सकाळ वृत्तसेवा
देवगड, ता. ३ ः मॉन्सून सक्रीय झाल्याने समाधानाची बाब मानली जात असतानाच अचानक पावसाने विश्रांती घेऊन शेतकर्‍यांची अडचण वाढविली आहे. पावसाने पूर्णपणे विश्रांती घेतल्याने पेरणी केलेल्या शेतकऱ्यांची चिंता वाढली आहे. वातावरणातील उकाड्यात वाढ झाली असून विहिरींच्या पाण्याची पातळी पुन्हा खाली जाऊ लागली आहे. दरम्यान, किनारी भागात ढगाळ वातावरण तयार होते; मात्र पाऊस पडला नाही.
तालुक्याच्या किनारी भागात अवकाळी पावसाने झोड उठवल्यानंतर पाठोपाठ मॉन्सून सक्रीय झाल्याने शेतकरी सुखावला होता; मात्र हा आनंद अल्पकाळच टिकला. धो-धो बरसल्यानंतर आता पावसाने पाठ फिरविली आहे. त्यामुळे आशेने पेरणी केलेल्या शेतकऱ्यांची चिंता वाढवणारी बाब ठरत आहे. अधूनमधून हलका पाऊस झाल्यास तरवा वर येण्यास मदत होईल. सध्या पावसाने विश्रांती घेतल्याने उकाडा वाढला आहे. दिवसा कडक ऊन पडत असल्याने उन्हाचे चटके बसत आहेत. मात्र, ऊन पडत असल्याने अवकाळी पावसामुळे खोळंबलेली कामे सध्या उरकण्यावर भर आहे. वाढत्या उकाड्यामुळे विहिरींचे पाणी पुन्हा खाली जात आहे. मात्र, यामुळे टंचाई भासणार नाही. किनारी भागात पावसाळी वातावरण तयार होत असते. मात्र, पाऊस हुलकावणी देत असल्याचे चित्र आहे.