चौकुळ समाजमंदिर सांस्कृतिक केंद्र ठरेल

swt510.jpg
68263
चौकुळ : जळवाडी येथे समाजमंदिराच्या भूमिपूजन कार्यक्रमाला उपस्थित संदीप गावडे व अन्य.

चौकुळ समाजमंदिर
सांस्कृतिक केंद्र ठरेल
मान्यवरांचा सुरः ग्रामस्थांच्या उपस्थितीत भूमिपूजन सोहळा
सकाळ वृत्तसेवा
सावंतवाडी, ता. ५ः चौकुळ जळवाडी येथे प्रस्तावित समाजमंदिराच्या कामाचा आज भाजपा युवा नेते तथा माजी पंचायत समिती सदस्य संदीप गावडे यांच्या हस्ते भूमिपूजन सोहळा उत्साहात पार पडला. या समाजमंदिरामुळे परिसरातील ग्रामस्थांना विविध सामाजिक आणि सांस्कृतिक कार्यक्रमांसाठी हक्काचे व्यासपीठ उपलब्ध होणार आहे, अशी भावना यावेळी उपस्थितांनी व्यक्त केली.
यावेळी गावडे यांनी समाजमंदिराच्या गरजेवर प्रकाश टाकला. हे समाजमंदिर परिसरातील एक महत्त्वाचे केंद्र बनेल, अशी आशा त्यांनी व्यक्त केली. त्यांनी स्थानिक स्वराज्य संस्थांच्या माध्यमातून विकासाची गंगा घराघरांत पोहोचवण्यासाठी भाजपा कटिबद्ध असल्याचेही सांगितले. चौकुळचे सरपंच गुलाबराव गावडे यांनी समाजमंदिराच्या कामासाठी ग्रामस्थांकडून मिळालेल्या सहकार्याबद्दल कृतज्ञता व्यक्त केली. हे समाजमंदिर ग्रामस्थांच्या एकोप्याचे प्रतीक ठरेल, असेही ते म्हणाले.
या सोहळ्याला चौकुळचे सरपंच गावडे, बूथ अध्यक्ष संतोष गावडे, बूथ अध्यक्ष सोमा गावडे, चौकुळ विकास सोसायटीचे चेअरमन पी. डी. गावडे, दयानंद गावडे, गेळे सरपंच सागर ढोकरे आणि निहार शिरसाट उपस्थित होते. सर्वांनी मिळून नारळ फोडून आणि मंत्रोच्चार करून समाजमंदिराच्या कामाचे विधिवत भूमिपूजन केले. या प्रसंगी उपस्थित असलेल्या सर्व ग्रामस्थांनी या कामासाठी शुभेच्छा दिल्या. हे समाजमंदिर लवकर पूर्ण होऊन ते ग्रामस्थांच्या सेवेत रुजू होईल, अशी अपेक्षा व्यक्त केली. हे समाजमंदिर चौकुळ जळवाडी परिसरातील सामाजिक आणि सांस्कृतिक विकासात मोलाची भर घालेल, असा विश्वास व्यक्त केला जात आहे.