बक्षिसाच्या रकमेतून निराधारांना मदत

swt53.jpg
68267
पणदूरः संकल्प शिवप्रतिष्ठान मांडकुली या संस्थेच्या कार्यकर्त्यांनी नाटकाच्या बक्षीस रकमेतून संविता आश्रमातील बांधवांसाठी सहाय्य केले.

बक्षिसाच्या रकमेतून निराधारांना मदत
संविता आश्रमास साहित्यः मांडकुली संकल्प प्रतिष्ठानचा स्तुत्य उपक्रम
सकाळ वृत्तसेवा
कुडाळ, ता. ५ः तालुक्यातील संकल्प शिवप्रतिष्ठान मांडकुली या संस्थेच्या युवा कार्यकर्त्यांनी शिवजयंती दिनी सादर केलेल्या नाटकाच्या बक्षीस रकमेतून संविता आश्रमातील बांधवांसाठी सहाय्य केले.
मांडकुली गावातील हौशी नाट्यप्रेमी युवकांनी छत्रपती शिवरायांची प्रेरणा घेऊन गावात संकल्प शिवप्रतिष्ठान या संस्थेची स्थापना केली. या संस्थेच्या माध्यमातून त्यांनी शिवजयंती निमित्ताने मेहनत घेऊन ‘मालवणी धूमशान’ या नाटकाची गावातल्याच युवकांच्या सहभागाने निर्मिती आणि संयोजन केले. गावातील तरुण मंडळींच्या या नाट्य उपक्रमाला ग्रामस्थांनी भरघोस प्रतिसाद दिला.
ग्रामस्थांनी नाटकातील कलाकारांना रोख रकमेची बक्षिसे देऊन त्यांचे कौतुक केले. या तरुण मंडळींनी नाटकाच्या बक्षिसाची रक्कम आपापसात वाटून न घेता किंवा अन्य काही न करता या रकमेतून समाजातील निराधार वंचित बांधवांच्या सेवेसाठी कार्यरत असलेल्या जीवन आनंद संस्थेच्या पणदूर येथील संविता आश्रमाला जीवनावश्यक वस्तूंचे सहाय्य करून एक आदर्श असा पायंडा रचला.
या नाट्यसमूहातील लहानथोर मंडळींनी पणदूरच्या संविता आश्रमाला नुकतीच प्रत्यक्ष भेट देऊन तांदूळ व खाद्यतेल या जीवनावश्यक वस्तूंसह बांधवांसाठी बिस्किट व लाडूचा खाऊ आश्रमाला दिला. जीवन आनंद संस्थेचे संस्थापक अध्यक्ष संदीप परब यांनी मांडकुलीच्या शिवप्रेमी व नाट्यप्रेमी युवकांचे तोंडभरून कौतुक केले. गावातील उपक्रमशील शिक्षक अनिल गोवेकर, मंगेश मराठे, अमोल गोसावी, नाट्य दिग्दर्शक अक्षय कासले, अभिनेते आणि केरवडे गावचे सुपुत्र सचिन गुंड, ज्येष्ठ नाट्य अभ्यासक अंकुश कुंभार यांनी नाट्य निर्मितीसाठी बहुमुल्य मार्गदर्शन केले. या हौशी नाट्य मंडळामध्ये अक्षय कासले, वेदांत गावडे, सुमन गावडे, विक्रांत गावडे, गोविंद गावडे, गौरेश पिंगुळकर, हरेश व प्रज्ञय नेमळेकर, महेश मोर्ये, सचिन गुंड, मिलिंद मसूरकर, अजय कासले, सूरज शेगले, कल्पेश साळगावकर, रोहित मोरमकर, मंदार व यश गोसावी, आकाश कासले, दीपक खरुडे, प्रसाद वारंग, रामचंद्र पेडणेकर, ज्ञानेश्वर कासले, वासुदेव परब, श्रीकांत कासले, विनायक सावंत, रमेश वारंग, सोनू मांजरेकर या तरुणांनी नाट्य निर्मिती आणि संयोजनात मोलाची कामगिरी केली.