वेरवलीत मियावाकी पद्धतीचे जंगल उभारणार

- rat६p९.jpg-
२५N६८४९१
लांजा ः वृक्षारोपण करताना संस्थेचे अध्यक्ष मारूती डोळस, एम. जी. पाटील, बाबासाहेब ढेकळे, शोभा बुरटुके, सिद्धार्थ हिंगमिरे, तंत्र मयुरेश आंबेकर, सचिव सुरेश चव्हाण, मुख्याध्यापक अरूण डोळे.
---
वेरवलीत ‘मियावाकी’ पद्धतीचे जंगल उभारणार
शिक्षणसंस्थेची संकल्पना; ६०० रोपे उपलब्ध, सामाजिक वनीकरणाचे सहकार्य
सकाळ वृत्तसेवा
लांजा, ता. ६ ः वेरवली शिक्षणसंस्थेचे अध्यक्ष मारूती डोळस यांच्या संकल्पनेमधून या परिसरात मियावाकी पद्धतीचे जंगल उभे करण्यात येणार आहे. त्यासाठी सामाजिक वनीकरण विभाग व वनविभाग लांजा यांच्या सहकार्यातून वेरवली शिक्षणसंस्थेच्या परिसरात वाढणाऱ्या विविध २२ प्रकारच्या जातींची सुमारे ६०० रोपे विद्यालयाला उपलब्ध झाली आहेत. एका विशिष्ट पद्धतीने या रोपांची लागवड करून तिथे मोठे जंगल उभे करून पशु-पक्षी यांच्यासाठी हक्काचा निवारा करण्याचा प्रयत्न करण्यात येणार आहे.
पर्यावरणदिनाचे औचित्य साधून काल (ता. ५) वेरवली हायस्कूल येथे मियावाकी जंगलनिर्मितीचा प्रारंभ वृक्षारोपणाने करण्यात आला. हा उपक्रम वेरवली पंचक्रोशी शिक्षण मंडळ संचलित श्रीराम विद्यालय, तुकाराम पुंडलिक शेट्ये कनिष्ठ महाविद्यालय व का. रा. कोळवणकर यामाहा ट्रेनिंग स्कूल व समाजिक वनीकरण आणि वनविभाग यांच्या संयुक्त विद्यमाने राबवण्यात येत आहे. या प्रसंगी वनपाल एम. जी. पाटील, वनरक्षक बाबासाहेब ढेकळे, शोभा बुरटुके, वनरक्षक सिद्धार्थ हिंगमिरे, तंत्र सहाय्यक मयुरेश आंबेकर, संस्थेचे अध्यक्ष मारूती डोळस, सहाय्यक सचिव सुरेश चव्हाण, विद्यालयाचे माजी विद्यार्थी व ग्रामस्थ नितीन डोळस, मुख्याध्यापक अरूण डोळे आदी उपस्थित होते. पर्यावरण रक्षण हे प्रत्येक नागरिकाचे कर्तव्य असून, त्यासाठी सजगपणे प्रत्येकाने काम करावे असे आवाहन पाटील यांनी या वेळी केले. विभागाकडून पुरवण्यात आलेल्या झाडांची योग्य जोपासना होईल, असा विश्वास ढेकळे यांनी व्यक्त केला. या कार्यक्रमाचे सूत्रसंचालन व आभार विद्यालयाचे ज्येष्ठ शिक्षक सचिन कांबळे यांनी केले.