‘कोकमलाही भरपाई द्या’

‘कोकमलाही
भरपाई द्या’
सावंतवाडी ः अवकाळी व मॉन्सूनपूर्व पावसाने यावर्षी कोकम पिकाचे मोठे नुकसान झाले आहे. पिकलेले व कच्चे रतांबे पावसामुळे कोसळून पडल्याने कोकम उत्पादक शेतकऱ्यांचे कंबरडे मोडले आहे. या वर्षी कोकम उत्पादन जेमतेम ८ ते १० टक्केच मिळाल्याचे शेतकऱ्यांचे म्हणणे आहे. कृषी विभागाने या नुकसानीचे पंचनामे करून आंबा, काजू उत्पादकांप्रमाणेच कोकम उत्पादकांनाही शासनाने नुकसान भरपाई द्यावी, अशी मागणी शेतकऱ्यांमधून होत आहे. कोकमचा हंगाम मे महिन्यात सुरू होतो आणि तो आठ-दहा जूनपर्यंत चालतो. परंतु, या वेळेस पाऊस सुरू झाल्याने कोकम फळे वाया गेली आहेत. त्यामुळे शेतकऱ्यांबरोबरच कोकम प्रक्रिया उद्योग आणि त्यावर आधारित व्यावसायिकही अडचणीत आले आहेत. यामुळे कोकमपासून तयार होणारी उत्पादने महागण्याची शक्यता आहे.
----
घोटगेत शेतकऱ्यांना
बियाण्यांचे वाटप
कुडाळ ः घोटगे ग्रामपंचायतीतर्फे पंधराव्या वित्त आयोगांतर्गत घोटगे गावातील अडीचशे शेतकऱ्यांना सरपंच चैताली ढवळ व उपसरपंच विजय नाईक यांच्या हस्ते मोफत वाटप करण्यात आले. ग्रामपंचायत सदस्या अनुसया ढवळ, रमाकांत कोरगावकर, पंढरीनाथ गुरव, जयश्री मडवळ, लतिका गुरव, ग्रामसेवक गणेश भोगले, कृषी सहाय्यक रोशन मर्गज व शेतकरी बांधव उपस्थित होते.
.....................
वेंगुर्लेत १५ ला
गुणगौरव सोहळा
वेंगुर्ले ः गौड सारस्वत ब्राह्मण समाज, वेंगुर्ले यांच्यावतीने शैक्षणिक वर्ष २०२४ - २५ मध्ये दहावी व बारावीच्या परीक्षांमध्ये ६० टक्क्यांपेक्षा अधिक गुण प्राप्त करणाऱ्या तालुक्यातील समाज बांधवांच्या गुणवंत विद्यार्थ्यांचा गुणगौरव समारंभ १५ ला स्वामिनी मंगल कार्यालय वेंगुर्ले येथे सकाळी १० वाजता होणार आहे. समाजाच्या अध्यक्षा सुजाता पडवळ किंवा संजय पुनाळेकर यांच्याकडे १२ जूनपर्यंत नावे नोंदवावीत, असे आवाहन अध्यक्षा पडवळ यांनी केले आहे.
.........................
सावंतवाडीत आज
ज्येष्ठ नागरिक सभा
सावंतवाडी ः सावंतवाडी तालुका ज्येष्ठ नागरिक संघाची मासिक सभा उद्या (ता.७) सकाळी १०.३० वाजता ज्येष्ठ नागरिक सुविधा केंद्र, सालईवाडा, सावंतवाडी येथे आयोजित करण्यात आली आहे. सर्व कार्यकारिणी सदस्य, पदाधिकारी व सभासदांनी उपस्थित राहवे, असे आवाहन संघटनेतर्फे करण्यात आले आहे.