मंडणगड-उघडीप मिळताच शेताकडे धाव

rat6p14.jpg
68497
देव्हारेः पावसाची उघडीप मिळताच नांगर धरून पेरणी काम करताना महिला शेतकरी.
-----------
उघडीप मिळताच शेताकडे धाव
शेतकऱ्यांची पेरणीसाठी धावपळ; संततधारेमुळे चिखलातच पेरणी
मंडणगड, ता. ६ः पावसाची थोडी उघडीप मिळताच नांगर घेऊन पेरणी करण्यासाठी शेतकरी शेताकडे धाव घेत आहेत. संततधार कायम राहिली असून, धूळवाफेसाठी आवश्यक असणारे ऊन आता शक्य नसल्याने शेतकऱ्यांना आता चिखलपेरणी करावी लागणार असल्याचे चित्र आहे. परिणामी, उत्पादन घटण्याची शक्यता निर्माण झाली आहे. मे आणि जूनमध्ये सुमारे ५०० मिमी पाऊस पडला आहे.
मे महिन्यातच पावसाने जोरदार हजेरी लावल्याने यावर्षीच्या खरीप हंगामातील कामाचे नियोजन बिघडून गेले. रोहिणी नक्षत्राच्या पार्श्वभूमीवर येथील शेतकरी पेरणी करत आला आहे; मात्र बदललेल्या वातावरणामुळे या वेळी त्याला हा मुहूर्त साधता आला नाही. परिणामी, पेरणी झाल्या नाहीत. कृषी विभागाकडून आधी पेरणी करू नये, असे सांगण्यात आले; मात्र पाऊस उघडीप देत नसल्याने यानंतर पेरणी कधी करायची, असा प्रश्न शेतकऱ्यांसमोर आहे. पेरणीनंतर बेर, फोड आणि चिखलणी असे शेतीकामांचे नियोजन असते. पेरणीच झाली नसल्याने पुढील कामे खोळंबून गेली आहेत. सध्या पाणथळ खलाटी भागात पाणी तुंबले आहे. तीन-चार दिवसांत पेरणी पूर्ण न झाल्यास खरीप हंगामातील क्षेत्र घटण्याची शक्यता आहे. आतापर्यंत तालुक्यात मॉन्सूनपूर्व ४९४.३० मिमी, तर नियमित मान्सून पावसाची ४६.९५ मिमी नोंद झाल्याचे तहसील कार्यालयातून सांगण्यात आले. मॉन्सूनपूर्व पावसाने शेतकऱ्यांचे शेतीचे नियोजन बिघडवून टाकले आहे.