-महावितरणचे शून्य अपघाताचे ध्येय

-rat७p१.jpg-
२५N६८७२०
रत्नागिरी ः महावितरणच्या वर्धापनदिनानिमित्त आयोजित कार्यक्रमात केक कापताना अधिकारी.
----
महावितरणचे शून्य अपघाताचे ध्येय
अनिल डोये ः वर्धापनदिन उत्साहात साजरा
सकाळ वृत्तसेवा
रत्नागिरी, ता. ७ : महावितरणच्या २०व्या वर्धापनदिनानिमित्त १ ते ६ जूनदरम्यान विद्युतसुरक्षा सप्ताह राबवण्यात आला. सप्ताहामुळे महावितरण कर्मचारी व सर्वसामान्य नागरिकांमध्ये विद्युतसुरक्षेबाबत जनजागृती होत आहे. यापुढे शून्य अपघाताचे ध्येय साध्य करणे हे महावितरणचे उद्दिष्ट असणार असून, सध्या सुरू असणारे सुरक्षा जागरूकता आणि दक्षता वर्षभर पाळावी, असे प्रतिपादन रत्नागिरी परिमंडलाचे मुख्य अभियंता अनिल डोये यांनी केले.
रत्नागिरी येथे महावितरण वर्धापनदिनानिमित्त आयोजित कार्यक्रमात ते बोलत होते. रत्नागिरी परिमंडलचे मुख्य अभियंता अनिल डोये यांच्या उपस्थित परिमंडलाच्या प्रांगणात अभियंते, अधिकारी, कर्मचारी यांनी विद्युत सुरक्षेविषयी प्रतिज्ञा घेण्यात आली. या वेळी डोये म्हणाले, प्रत्येकानेच विजेच्या बाबतीत योग्य खबरदारी घ्यायला हवी. याबरोबरच भविष्यामध्ये कोणतेही विद्युत अपघात होणार नाहीत याची काळजीदेखील घ्यायला हवी. जनमानसांत त्याबाबत सजगता जागृत करावी. त्यामुळे शून्य अपघात हे महावितरणचे ध्येय साध्य होणार आहे. या वेळी उपस्थित कर्मचाऱ्यांना ''हे योद्धे महावितरणचे'' ही ध्वनिचित्रफीत दाखवण्यात आली. वर्धापनदिनाच्या निमित्ताने रत्नागिरी शहरातील स्वा. वि. दा. सावरकर नाट्यगृहात ‘गितोंका सफर’ या आयोजित मनोरंजनात्मक कार्यक्रमास महावितरणच्या सर्व अधिकारी, कर्मचारी विविध संघटना प्रतिनिधी यांनी उत्स्फूर्त सहभाग नोंदवला.