क्लबफुट क्लिनिकमध्ये १७ बालकांवर मोफत उपचार

क्लबफुट क्लिनिकमध्ये १७ बालकांवर मोफत उपचार
डॉ. भास्कर जगताप ; बाळाला आधाराशिवाय चालण्यास मदत
सकाळ वृत्तसेवा
रत्नागिरी, ता. ८ः जिल्हा तत्काळ हस्तक्षेप केंद्रात २०२२ पासून क्लबफुट क्लिनिक सुरु केले आहे. या क्लिनिकमध्ये आतापर्यत १७ बालकांवर यशस्वी मोफत उपचार करण्यात आले असून ही बालके भविष्यात स्वतःच्या पायाने चालणार आहे. अशी माहिती जिल्हा शल्य चिकित्सक डॉ. भास्कर जगताप यांनी दिली.
जिल्हा रुग्णालयांतर्गत राष्ट्रीय बाल स्वास्थ कार्यक्रम तसेच जिल्हा तत्काळ हस्तक्षे केंद्र यांच्या संयुक्त विद्यमाने जिल्हा शल्य चिकित्सक डॉ. भास्कर जगताप यांच्या प्रमुख उपस्थितीत गुरुवारी जागतिक क्लबफूट दिन या रुग्णालयात साजरा करण्यात आला. कार्यक्रमावेळी निवासी वैद्यकीय अधिकारी डॉ. अंकुश शिरसाट, अस्थिरोगतज्ज्ञ डॉ. निखिल देवकर, व्यवसायोपचार तज्ज्ञ कुणाल देसाई, जिल्हा तत्काळ हस्तक्षेप केंद्राचे व्यवस्थापक सागर बने, राष्ट्रीय बाल स्वास्थ कार्यक्रमाच्या जिल्हा समन्वयक आरती कदम, क्लबफूट किल्निकच्या समन्वयक सुप्रिया कांबळे आदी उपस्थित होते.
बालकांच्या पालकांचा जिल्हा शल्यचिकित्सक डॉ. जगताप यांच्या हस्ते सन्मान करण्यात येऊन बालकांना क्लबफुट ब्रेसेस, वाटप करण्यात आले. यावेळी डॉ. देवकर यांनी क्लबफुट म्हणजे काय हे विशद करताना सांगितले की, क्लबफुट म्हणजे जिथे बाळाचा पाय आत आणि खाली वळलेला असतो, बहुतेक वेळा तळ बाजूला किंवा वरच्या दिशेने असतो, अशा परिस्थितीत क्लबफूटची योग्य स्थिती राखण्यासाठी ही उपकरणे वापरली जातात. ज्यामुळे पुन्हा दुखापत टाळाता येते. हे दोन खास शुज असतात जे एका बारने जोडलेल असतात. जे खांद्याच्या रुंदीवर पाय वेगळे ठेवतात. भविष्यात बाळाला कोणत्याही आधाराशिवाय चालण्यास मदत करतात. यावेळी क्लबफुटची अन्य लक्षणेही सांगितली. जिल्हा शल्य चिकित्सक डॉ. जगताप यांनी जिल्हा रुग्णालयात या आजारावर मोफत उपचार होतात. असे सांगित जिल्ह्यातील गरजू पालकांनी याचा लाभ घेण्यासाठी आवर्जून पुढे यावे असे आवाहन केले.