शासकीय वसतिगृह विद्यार्थ्यांना आवाहन

शासकीय वसतिगृह
विद्यार्थ्यांना आवाहन
सिंधुदुर्गनगरी ः सामाजिक न्याय विभाग, सहायक आयुक्त समाजकल्याण सिंधुदुर्ग या कार्यालयाच्या अधिनस्त असलेल्या शासकीय वसतिगृहांची प्रवेश-प्रक्रिया २०२४-२५ पासून ऑनलाईन पोर्टलवर सुरू केली आहे. विद्यार्थ्यांचे अर्ज पोर्टलद्वारे स्वीकारले आहेत. अनेक विद्यार्थ्यांनी ‘रिव्हर्ट बॅक’ केलेले अर्ज अजून फेरसादर केले नाहीत. त्यामुळे या विद्यार्थ्यांनी अर्जातील त्रृटींची पूर्तता १० जूनपर्यंत करावी, असे आवाहन समाजकल्याण सहायक आयुक्त संतोष चिकणे यांनी प्रसिद्धी पत्रकाद्वारे केले आहे. शासकीय वसतिगृहात विनामूल्य निवास व भोजनासह शैक्षणिक साहित्य, निर्वाह भत्ता, ग्रंथालय, जिम व इंटरनेट वाय-फाय आदी सुविधा विनामूल्य उपलब्ध करून देण्यात येतात. इच्छुक विद्यार्थ्यांनी तालुक्यास्तरावरील शासकीय वसतिगृहाचे गृहपाल किंवा सहायक आयुक्त समाजकल्याण कार्यालयाशी संपर्क साधावा, असे आवाहन केले आहे.
..................
‘मुख्यमंत्री रोजगार
योजनेचा लाभ घ्या’
सिंधुदुर्गनगरी : राज्यातील शहरी व ग्रामीण क्षेत्रातील सुशिक्षित बेरोजगारांना स्वयंरोजगाराच्या नवीन संधी विचारात घेऊन उद्योजकतेला चालना देणारी सर्वसमावेशक ‘मुख्यमंत्री रोजगार निर्मित कार्यक्रम’ ही योजना राबविण्यात येत आहे. नवीन शासन निर्णयानुसार पात्र लाभार्थ्यांनी या योजनेचा लाभ घ्यावा, असे आवाहन जिल्हा उद्योग केंद्राचे महाव्यवस्थापक श्रीपाद दामले यांनी केले आहे. या योजनेत कुक्कुटपालन, अंडी उबवणी केंद्र, मधुमक्षिका पालन, मत्स्यपालन, रेशीम उद्योग, हॉटेल, होमस्टे, क्लाउड किचन, जलक्रीडा, मासेमारी, प्रवासी वाहतुकीकरिता बोट व्यवसाय या उद्योगांचा समावेश आहे. सर्व पात्र बेरोजगारांनी या योजनेचा लाभ घ्यावा, असे आवाहन केले आहे.