-युध्दजन्य परिस्थितीमुळे विद्यार्थ्यांची नासा भेट जुलैमध्ये

युद्धजन्य परिस्थितीमुळे नासा भेट जुलैमध्ये
जिल्हा परिषद; विद्यार्थ्यांची २०ला मुंबईत व्हिसासाठी मुलाखती
सकाळ वृत्तसेवा
रत्नागिरी, ता. १० ः अंतराळ संशोधनाबाबत जिज्ञासा निर्माण व्हावी यासाठी जिल्हा परिषदेने सुरू केलेल्या प्राथमिक शाळेतील विद्यार्थ्यांच्या नासा (अमेरिका) सफरीला यंदा युद्धजन्य परिस्थितीमुळे विलंब झाला आहे. जून महिन्यात होणारा हा परदेस दौरा लांबला असून, प्रवासी व्हिसा मिळण्यात अडचणी आल्या होत्या; मात्र नुकतीच व्हिसा काढण्याची प्रक्रिया २० जूनला होणार असल्याने जुलै महिन्यात हा दौरा होईल, अशी अपेक्षा आहे. नासा भेटीसाठी जिल्हा परिषद प्राथमिक शाळेतील २० विद्यार्थ्यांची निवड झाली आहे.
नासा व इस्रो या अभ्यासदौऱ्यासाठी जिल्हा परिषद शाळास्तरावर विद्यार्थ्यांची चाळणी परीक्षा घेण्यात आली होती. त्यामधून ५५ विद्यार्थ्यांची निवड करण्यात आली. त्यातील २२ मुले नासासाठी निवडली गेली आहेत. जिल्हा परिषद मुख्य कार्यकारी यांच्या मार्गदर्शनाखाली सलग तिसऱ्या वर्षी हा उपक्रम राबवण्यात येत आहे. नासा व इस्रो भेटीसाठी जिल्हा परिषद प्रशासनाने केंद्रस्तरावर विद्यार्थ्यांची परीक्षा घेतली होती. त्यातून नासा-इस्रो संस्थांना भेट देण्यासाठी विद्यार्थ्यांची अंतिम निवड करण्यात आली होती. जिल्हा नियोजनामधून निधी वाढवून देण्यासाठी पालकमंत्री उदय सामंत यांनी सर्वतोपरी सहकार्य केले. नासा भेटीसाठी निवड झालेले विद्यार्थी जूनच्या पहिल्या आठवड्यात दौरा करणार होते; पण हा दौरा भारत-पाकिस्तान यांच्यात झालेल्या युद्धामुळे लांबणीवर गेला; मात्र ही परिस्थिती निवळल्यानंतर अमेरिकेत जाण्यासाठीचा मार्गही मोकळा झाला आहे. २० जूनला व्हिसा काढण्यासाठी विद्यार्थ्यांची मुलाखत घेतली जाणार आहे. या विद्यार्थ्यांसोबत जिल्हा परिषदेतील अधिकारी, शिक्षकही जाणार आहेत.

चौकट १
नासाला निवड झालेले विद्यार्थी
नासा भेटीसाठी निवडलेले विद्यार्थी : रूतिका खापरे, श्रेयस पवार, जान्हवी तांबुटकर, अंशुल पाटील, यशस्वी चव्हाण, आदिती पवार, सृष्टी भुवड, श्रावणी गमरे, सोहम बावधनकर, स्वरा लांजेकर, अर्णव शिंदे, समीक्षा बोडेकर, भावना सावंत, कार्तिकी सागवेकर, लावण्या पवार, सुनीता तावडे, शौर्य जाधव, देवयानी आग्रे, शिवाली घुमे, पद्मश्री गोंडाळ.
---