जन्मो जन्मी हाच पती मिळावा!

69610

जन्मो जन्मी हाच पती मिळावा!

सुवासिनींचे मागणे; सावंतवाडीत वटपौर्णिमा उत्साहात

सकाळ वृत्तसेवा
सावंतवाडी, ता. १० ः ‘जन्मो जन्मी हाच पती मिळावा’ अशी मागणी करत जन्मोजन्मीच्या नात्याची वीण घट्ट धरून वडाला प्रदक्षिणा घालून पतीदेवाच्या दीर्घायुष्याची प्रार्थना करीत आज गावोगावच्या सावित्रींनी वडाचे पूजन केले. गावागावांत सुवासिनींनी एकत्र येत वटपौर्णिमा साजरी केली.
गावात वटवृक्षांचे पूजन केले असताना शहरातील काही भागांत मात्र अनेक सुवासिनींनी वडाच्या झाडाचे चित्र रेखाटून तसेच छोटी वडाची फांदी रोवून वटपौर्णिमा साजरी केली. काही सोसायट्यांमध्ये वडाचे रोप किंवा फांदी कुंडीत लावून सर्व महिला पूजेसाठी एकत्र आल्या होत्या. सोशल मीडियावर अनेकींनी पूजा करतानाचे फोटो व रील्स पोस्ट केल्याचे पाहायला मिळाले.
सावित्रीचा पती सत्यवान वडाच्या झाडाखाली गतप्राण झाला. सावित्रीने आपल्या तपोबळावर यमराजाकडून सत्यवानाचे प्राण परत आणले, अशी आख्यायिका सांगितली जाते. या संकेताला अनुसरून महिला या दिवशी वडाची पूजा करतात. त्यासाठी त्या वटवृक्ष असेल त्या ठिकाणी जाऊन वडाच्या मुळाशी पाणी घालतात व वटवृक्षाचे पूजन करून आणि त्याला प्रदक्षिणा घालून सुताचे वेष्टन करतात. पूजेनंतर सुवासिनी एकमेकींना सौभाग्यवाण देतात. सावंतवाडी शहरासह तालुक्यात याच पार्श्वभूमीवर वटपौर्णिमा मोठ्या उत्साहात साजरी झाली. शहरातील महिलांनी एकत्र येत सौभाग्याचे वाण दिले. ग्रामीण भागांतही वाड्या, रस्त्यांवर असलेल्या वटवृक्षांचे पूजन करून व सुतांचे वेष्टन करून सौभाग्याचे वाण दिले.