कचरा टाकणाऱ्यांवर दंडात्‍मक कारवाई

kan112.jpg
69799
कणकवलीः शहरातील महापुरूष कॉम्प्लेक्स येथे कचरा टाकण्यात आला होता.

कचरा टाकणाऱ्यांवर दंडात्‍मक कारवाई
कणकवली नगरपंचायतीचा इशाराः दुकानदारावर पाचशे रूपये दंडात्‍मक कारवाई
सकाळ वृत्तसेवा
कणकवली, ता.११ ः कणकवली शहरात उघड्यावर कचरा टाकणाऱ्यांवर दंडात्‍मक कारवाई केली जाणार असल्‍याचा इशारा नगरपंचायत प्रशासनाने दिला आहे. दरम्‍यान बाजारपेठेत महापुरुष कॉम्प्लेक्‍स येथे कचरा टाकल्‍या प्रकरणी शहरातील एका व्यापाऱ्यावर पाचशे रूपये दंडात्‍मक कारवाई करण्यात आली.
कणकवली शहरात नगरपंचायतीच्यावतीने सकाळच्या सत्रात तसेच रात्री कचरा उचलला जातो. मात्र नगरपंचायतीचीकडून कचरा उचलण्यात आल्‍यानंतर काही नागरिक, व्यापारी पुन्हा उघड्यावर कचरा टाकतात. याबाबत गेल्‍या आठवड्यात नगरपंचायतीकडून व्यापारी, नागरिक यांना सूचित केले होते. तरीही बाजारपेठेत कचरा टाकण्यात आल्‍याची घटना घडली. महापुरूष कॉम्प्लेक्‍स येथील रस्त्यावर हा कचरा टाकण्यात आला होता. तेथीलच एका दुकान व्यावसायिकाने हा कचरा टाकल्‍याचे निष्पन्न झाल्‍यानंतर त्‍या दुकानदारावर नगरपंचायतीच्या पथकाने पाचशे रूपये दंडाची कारवाई केली.
दरम्‍यान शहरातील उड्डाणपुलाखालीही भाजी विक्रेत्‍यांकडून कचरा टाकला जातो. याबाबत सर्व भाजी विक्रेत्‍यांचे सर्वेक्षण केले जात आहे. यात प्रत्‍येक भाजी, फळ व इतर वस्तू विक्रेत्‍यांना नगरपंचायतीकडून उघड्यावर कचरा न टाकण्याच्या सूचना देण्यात आल्‍या आहेत. या सूचनांचे उल्‍लंघन करून कचरा टाकण्यात आला. तर या विक्रेत्‍यांवरही दंडात्मक कारवाईचा इशारा आज नगरपंचायत पथकाकडून देण्यात आला.
मुख्याधिकारी गौरी पाटील यांच्या मार्गदर्शनाखाली नगरपंचायतच्या स्वच्छता विभागाचे मुकादम प्रकाश राठोड व सफाई कर्मचारी तुषार कांबळे यांच्या पथकाने आज शहरातील व्यापारी, विक्रेते यांना उघड्यावर कचरा न टाकण्याबाबत सूचना दिल्‍या.