शिवराज्याभिषेक दिन सोहळा किल्ले रायगडावर उत्साहात

swt121.jpg
70084
रायगडः छत्रपती शिवाजी महाराजांच्या ३५२ व्या राज्याभिषेक सोहळ्याप्रसंगी उपमुख्यमंत्री एकनाथ शिंदे, भरत गोगावले, सुनील पवार आदी. (छायाचित्रः वैभव पवार)

शिवराज्याभिषेक दिन सोहळा
किल्ले रायगडावर उत्साहात
सकाळ वृत्तसेवा
कुडाळ, ता. १२ः रयतेचे राजे छत्रपती शिवाजी महाराज यांचा ३५२ वा राज्याभिषेक सोहळा रायगडावर हजारो मावळ्यांच्या उपस्थितीत विविध धार्मिक, सांस्कृतिक कार्यक्रमांनी दिमाखात साजरा करण्यात आला. महाराष्ट्राच्या कानाकोपऱ्यातून शिवाजी महाराजांचे मावळे या सोहळ्यात सहभागी झाले. छत्रपती शिवाजी महाराज यांचा ३५२ वा राज्याभिषेक दिन सोहळा (हिंदू साम्राज्य दिन) ज्येष्ठ शुद्ध त्रयोदशी या तिथीला किल्ले रायगडावर ८ व ९ जूनला हजारो मावळ्यांच्या उपस्थितीत साजरा झाला. दोन्ही दिवस विविध कार्यक्रम पार पडले. 
या सोहळ्याला महाराष्ट्राचे उपमुख्यमंत्री एकनाथ शिंदे, उद्योग मंत्री उदय सामंत, स्वागताध्यक्ष व रोजगार हमी खारभूमी विकास मंत्री भरतशेठ गोगावले, निमंत्रक शिवराज्याभिषेक दिनोत्सव सेवा समिती किल्ले रायगड अध्यक्ष सुनील पवार, गृहराज्यमंत्री योगेश कदम, खासदार श्रीरंग बारणे, सनी ताठेले, समीर वारेकर, राजू देसाई, रंजन गावडे, वैभव पवार, संलग्न संस्था आणि त्यांचे प्रतिनिधी उपस्थित होते. सोहळ्याच्या पहिल्या दिवशी रविवारी (ता. ८) सकाळी श्री गढदेवता सिकाई पूजन, छत्रपती शंभू महाराज जयंती उत्सव, शंभुराई पूजन, शंभू व्याख्यान, दुपारी महादरवाजा पूजन आणि तोरण, श्री जगदीश्वर पूजन व अभिषेक, श्री व्याडेश्वर पूजन व अभिषेक, श्री भवानी देवी पूजन व अभिषेक, महादरवाजा ध्वजारोहण, शिवतुलादान, पारंपरिक गोंधळ, रात्री सांस्कृतिक कार्यक्रम झाले. सोमवारी (ता. ९) सकाळी ध्वजारोहण (नगारखाना), श्री शिवराजाभिषेक सोहळा (राजसदर), शिवराई पूजन, श्री शिवसन्मान सोहळा, शिव पालखी, महाप्रसाद, दुपारी गड स्वच्छता मोहिमेने या सोहळ्याची सांगता झाली.