मुक्ताई ॲकॅडमीचे विद्यार्थी चमकले

swt123.jpg
70096
बेळगावः लखमराजेंसोबत डावीकडून कौस्तुभ पेडणेकर, बाळकृष्ण पेडणेकर, यथार्थ डांगी, मयुरेश परुळेकर.

मुक्ताई ॲकॅडमीचे विद्यार्थी चमकले
बेळगावातील बुद्धिबळ स्पर्धा : बाळकृष्ण पेडणेकरचे निर्विवाद वर्चस्व
सकाळ वृत्तसेवा
सावंतवाडी, ता. १२ः बेळगाव (कर्नाटक) येथील बेळगाव बुद्धिबळ असोसिएशनने ऑल इंडिया क्लासिकल रेटिंग बुद्धिबळ स्पर्धेचे आयोजन केले होते. तीन दिवस चाललेल्या या राष्ट्रीय स्तरावरील स्पर्धेत देशभरातील ४५३ खेळाडूंनी सहभाग घेतला. सिंधुदुर्ग जिल्ह्यातून सावंतवाडीतील मुक्ताई ॲकॅडमीचे विद्यार्थी बाळकृष्ण पेडणेकर, मयुरेश परुळेकर, यथार्थ डांगी, विभव राऊळ, चिदानंद रेडकर, पुष्कर केळुसकर यांनी स्पर्धेत सहभाग घेऊन उत्कृष्ट खेळाचे प्रदर्शन केले.
सिंधुदुर्ग जिल्ह्यातील प्रथम क्रमांकाचा २२ वर्षीय राष्ट्रीय खेळाडू बाळकृष्ण पेडणेकर याने स्पर्धेत निर्विवाद वर्चस्व प्रस्थापित करून स्पर्धेत नववा क्रमांक पटकावला. या संपूर्ण स्पर्धेत बाळकृष्ण अपराजित राहिला. त्याने नऊ राऊंडमध्ये सहा राउंड जिंकत तीन राउंड बरोबरीत सोडविले आणि साडेसात गुण प्राप्त केले. क्लासिकल, रॅपिड आणि ब्लिट्ज या तिन्ही प्रकारात त्याने सर्वोत्तम आंतरराष्ट्रीय रेटिंग मिळविले आहे.
या स्पर्धेत ॲकॅडमीचा पन्नास टक्के दृष्टिदोष असलेला मालवण येथील एकोणीस वर्षीय विद्यार्थी मयुरेश परुळेकर याने गटात प्रथम क्रमांक पटकावला. यापूर्वी देखील त्याने राष्ट्रीय स्तरावरील आणि युनिव्हर्सिटीच्या महाविद्यालयीन स्पर्धेत उत्कृष्ट खेळ करून अनेक पारितोषिके मिळविली आहेत. तेरा वर्षीय यथार्थ डांगी याने प्रथमच या स्पर्धेत सहभाग घेऊन चांगला खेळ केला. यथार्थने आंतरराष्ट्रीय रेटिंग मिळविले. मागील दहा वर्षांत ॲकॅडमीच्या तब्बल तेवीस विद्यार्थ्यांनी आंतरराष्ट्रीय रेटिंग मिळविले आहे.
मुक्ताई ॲकॅडमीचे अध्यक्ष व प्रशिक्षक कौस्तुभ पेडणेकर, राष्ट्रीय प्रशिक्षक उत्कर्ष लोमटे यांच्या मार्गदर्शनाखाली या विद्यार्थ्यांनी हे यश मिळविले. युवराज लखमराजे भोसले यांनी या विद्यार्थ्यांचे कौतुक करून पुढील वाटचालीसाठी शुभेच्छा दिल्या.