ध्येयपूर्तीसाठी प्रयत्नांची पराकाष्ठा करा

70421

ध्येयपूर्तीसाठी प्रयत्नांची पराकाष्ठा करा

डॉ. माणिक दिवे ः कणकवलीत पत्रकारांच्या पाल्यांचा गुणगौरव

कणकवली, ता.१३ ः विविध स्पर्धा, परीक्षांमध्ये यश प्राप्त करून तुम्‍ही स्वत:च्या कुटुंबाचे नाव रोशन केले आहे, ही बाब कौतुकास्पद आहे. आता यापुढील शैक्षणिक प्रवासात यशात सातत्य ठेवून आपल्‍या ध्येयपूर्तीसाठी प्रयत्नांची पराकाष्ठा करा, असे आवाहन सिंधुदुर्ग जिल्हा परिषदेचे मुख्य कार्यकारी अधिकारी डॉ.माणिक दिवे यांनी केले.
कणकवली तालुका पत्रकार संघातर्फे पत्रकारांच्या पाल्यांचा गुणगौरव सोहळा पंचायत समितीच्या सभागृहात झाला. यावेळी श्री. दिवे बोलत होते. यावेळी गटविकास अधिकारी अरुण चव्हाण, साहाय्यक गटविकास अधिकारी मंगेश वालावलकर, उमेश तोरसकर, भगवान लोके, गणेश जेठे, गटशिक्षणाधिकारी किशोर गवस, अभियंता श्री. घेवडे, तालुका आरोग्य अधिकारी डॉ. पूजा काळगे, पोलिस उपनिरीक्षक महेश शेगडे, विस्तार अधिकारी सूर्यकांत वारंग आदी उपस्थित होते.
कार्यक्रमात दहावीच्या परीक्षेत तालुक्यात प्रथम क्रमांक प्राप्त केलेल्या विधी विरेंद्र चिंदरकर हिचा माणिक दिवे यांच्या हस्ते गौरव करण्यात आला. तसेच विविध स्पर्धा व परीक्षांमध्ये यश प्राप्त विद्यार्थ्यांचा मान्यवरांच्या हस्ते प्रमाणपत्र, भेटवस्तू देऊन गौरव करण्यात आला. यावेळी जिल्हा बॅंकेचे कर्मचारी उदय तावडे हे सेवानिवृत्त झाल्याबद्दल त्यांचा विशेष सत्कार करण्यात आला. भगवान लोके यांनी प्रास्ताविक केले. लक्ष्मीकांत भावे यांनी सूत्रसंचालन केले. संजय सावंत यांनी आभार मानले.
---
पालकांना मार्गदर्शन
मंगेश वालावलकर म्हणाले, ‘‘पत्रकारांच्या पाल्यांचा गुणगौरव करण्याचा तालुका पत्रकार संघाचा कार्यक्रम कौतुकास्पद आहे. यापुढील काळात संघाने समाजोपयोगी उपक्रम राबवत रहावेत.’’ किशोर गवस म्हणाले, ‘‘कुटुंब व्यवस्थेत अमूलाग्र बदल झाल्याने कुटुंबातील लहान मुलांना शारीरिक व मानसिक ताण-तणावाला सामोरे जावे लागत आहे. त्यामुळे त्यांना नैराश्य येते त्‍यामुळे यश अपयशाची पर्वा न करता मुलांप्रती सर्वांनी सकारात्‍मकता ठेवायला हवी.’’