शिक्षकांच्या विविध समस्या विधिमंडळ बैठकीत मांडणार

70549

शिक्षकांच्या विविध समस्या
विधिमंडळ बैठकीत मांडणार

प्रा. आसगावकर ः प्रशिक्षण कार्यक्रमात ग्वाही

सकाळ वृत्तसेवा
तळेरे, ता. १४ ः एकाच वेतनश्रेणीत सलग २४ वर्षे सेवा पूर्ण केलेल्या सर्व शिक्षकांना सरसकट निवड श्रेणीचा लाभ देण्यात यावा. याशिवाय क्रीडा शिक्षकांना विशेष शिक्षकांचा दर्जा देऊन प्रत्येक शाळेत शारीरिक शिक्षण शिक्षक भरला जावा, अशी मागणी येत्या विधिमंडळाच्या बैठकीत करणार असल्याची माहिती पुणे विभागाचे शिक्षक आमदार प्रा. जयंत आसगावकर यांनी पेठवडगाव येथे कला व क्रीडा शिक्षकांच्या वरिष्ठ व निवड श्रेणी विभागीय प्रशिक्षणात दिले.
कोल्हापूर डाएटच्यावतीने १० ते १२ जून या कालावधीत सिंधुदुर्ग, रत्नागिरी, कोल्हापूर, सांगली व सातारा जिल्ह्यांतील शारीरिक शिक्षण शिक्षकांचे तीन दिवसीय प्रशिक्षण आयोजित केले होते. या प्रशिक्षणाच्या सांगता समारंभात श्री. आसगावकर प्रमुख पाहुणे म्हणून बोलत होते. निरोप समारंभ कार्यक्रमाचे अध्यक्षस्थान कोल्हापूर डाएटचे वरिष्ठ अधिव्याख्याता महादेव वाडंरे यांनी भूषविले होते. व्यासपीठावर आदर्श गुरुकुल विद्यालय शिक्षणसंकुलाचे संस्थापक अध्यक्ष डी. एस. घुगरे, संस्था सचिव व विद्यालयाच्या मुख्याध्यापिका एम. डी. घुगरे, आदर्श गुरुकुल विद्यालय पेठवडगाव प्रशिक्षण केंद्राचे सुलभक तथा किणी विद्यालयाचे मुख्याध्यापक पांडुरंग मोहनगेकर, कोल्हापूर जिल्हा क्रीडा शिक्षक महासंघाचे अध्यक्ष तथा सुलभक अनिल पाटील, आदी उपस्थित होते. किरण वाघमोडे यांनी सूत्रसंचालन केले. दत्तात्रय मारकड यांनी आभार मानले.