‘माडखोल फार्मसी’च्या २४ विद्यार्थ्यांना नोकरी

70568

‘माडखोल फार्मसी’च्या
२४ विद्यार्थ्यांना नोकरी

सावंतवाडी, ता. १४ ः व्ही. पी. कॉलेज ऑफ फार्मसी माडखोलमध्ये ३१ मे रोजी ट्रेनिंग अँड प्लेसमेंट सेल अणि युनिकेम लॅबोरेटरीस, गोवा यांच्यामार्फत कॅम्पस प्लेसमेंट ड्राईव्ह आयोजित केला होता. यात बी. फार्मसी २०२४-२५ मधील अंतिम वर्षाच्या अकरा विद्यार्थ्यांची प्रॉडक्शन डिपार्टमेंट, पाच विद्यार्थ्यांची क्वालिटी कंट्रोल डिपार्टमेंट आणि आठ विद्यार्थांची क्वालिटी ॲश्युरन्स डिपार्टमेंटमध्ये निवड झाली.
या कॅम्पस प्लेसमेंट ड्राईव्हसाठी समन्वयक म्हणून सहप्राध्यापक योगेश पुजारी आणि सहप्राध्यापिका नीलम सावंत यांनी विशेष परिश्रम घेतले. विद्यार्थ्यांना संस्थेचे प्रशासकीय अधिकारी पंकज पाटील, महाविद्यालयाचे प्राचार्य. डॉ सुनील शिंगाडे, प्लेसमेंट अधिकारी डॉ. संदेश सोमनाचे यांचे मोलाचे मार्गदर्शन लाभले. या विद्यार्थ्यांचे संस्थेचे आधारस्तंभ व प्रेरणास्थान माजी कुलगुरू डॉ. वेदप्रकाश पाटील व संस्थेचे कार्याध्यक्ष आमदार डॉ. राहुल पाटील यांनी अभिनंदन करून पुढील वाटचालीस शुभेच्छा दिल्या.
.................
70569

कृषिकन्यांकडून साळगावात
शेतकऱ्यांना तंत्रज्ञानाचे धडे

सावंतवाडी, ता. १४ : पावसाळी शेतीच्या पार्श्वभूमीवर कोकणातील शेतकऱ्यांना शेती व पिकांबाबत मार्गदर्शन करण्यासाठी छत्रपती शिवाजी कृषी विद्यापीठ किर्लोस ओरोस येथील प्रशिक्षणार्थी विद्या चौगुले व ग्रुप आणि इतर विद्यार्थिनींनी साळगाव-पवारवाडी (ता. कुडाळ) येथे ग्रामीण कृषी कार्यानुभव कार्यक्रमास शुक्रवारपासून (ता. १३) प्रारंभ केला.
डॉ. बाळासाहेब सावंत कोकण कृषी विद्यापीठ दापोली मान्यताप्राप्त असलेल्या छत्रपती कृषी विद्यापीठाचे विद्या चौगुले, साक्षी रावत, सलोनी मयेकर, वेदिका नाईक, जुगुनू नजीर या विद्यार्थिनी उपस्थित होत्या. यावेळी शेतीपूरक बियाणे, नवनवीन तंत्रज्ञानाबाबत विद्यार्थ्यांनी केलेल्या मार्गदर्शनाची दखल घेत उपस्थित शेतकऱ्यांनी विद्यार्थ्यांचे आभार मानले. साळगाव सरपंच अनघा दळवी, उपसरपंच दत्तप्रसाद साळगावकर आणि सिंधुदुर्ग जिल्ह्याचे सदस्य श्वेता लंगवे आदी उपस्थित होते.