रंगरंगोटीने रुग्ण बरे होणार का?
रंगरंगोटीने रुग्ण बरे होणार का?
ठाकरे गट ः मालवण रुग्णालयात रिक्त पदे भरा
सकाळ वृत्तसेवा
मालवण, ता. १४ : शिंदे शिवसेनेच्या पदाधिकाऱ्यांनी ग्रामीण रुग्णालयास भेट देऊन जनतेची दिशाभूल करण्याचे काम केले आहे. रुग्णालयात सीसीटीव्ही कॅमेरे बसवून, रंगरंगोटी करून रुग्ण बरे होणार आहेत का, असा प्रश्न उपस्थित करत आमदार नीलेश राणे व त्यांच्या सहकारी पदाधिकाऱ्यांना खरंच काही करून दाखवायचे असेल, तर ग्रामीण रुग्णालयास कायमस्वरुपी स्त्रीरोगतज्ज्ञ तसेच अन्य रिक्त पदे भरण्याचे धाडस दाखवावे, असे आव्हान ठाकरे शिवसेना पक्षाचे शहर प्रवक्ते महेंद्र म्हाडगुत यांनी पत्रकाद्वारे दिले आहे.
पत्रकात म्हटले आहे की, ‘दोन दिवसांपूर्वी शिवसेना जिल्हाप्रमुख दत्ता सामंत यांच्यासह अन्य पदाधिकाऱ्यांनी ग्रामीण रुग्णालयास भेट देत आढावा घेतला. प्रत्यक्षात ग्रामीण रुग्णालयात अनेक पदे गेली अनेक वर्षे रिक्त आहेत. रुग्णांना चांगली सेवा मिळत नसल्याने त्यांना उपचारासाठी इतरत्र हलवावे लागते. अशा परिस्थितीत रुग्णालयास आवश्यक असलेल्या सुविधा देण्याचे सोडून रुग्णालयात सीसीटीव्ही, रुग्णालयाची रंगरंगोटी केली जाईल, असे पदाधिकाऱ्यांकडून सांगण्यात आले. सीसीटीव्ही आणि रंगरंगोटी करून रुग्ण बरे होणार का, असा आमचा प्रश्न आहे. रुग्णालयास कायमस्वरूपी स्त्री रोगतज्ज्ञ नाही. त्यामुळे गर्भवतींच्या शस्त्रक्रिया, प्रसूती ग्रामीण रुग्णालयात होत नाहीत. डायलिसिस मशीन उपलब्ध आहे; मात्र त्यासाठी ऑपरेटर नाही. ग्रामीण रुग्णालयात अत्यावश्यक सुविधा नसल्यानेच रुग्णांना पडवे किंवा गोवा येथे उपचारासाठी दाखल करावे लागते, याचा गांभीर्याने विचार सत्ताधारी आमदार नीलेश राणे करतील का? ग्रामीण रुग्णालयात उपचारासाठी दाखल होणाऱ्या रुग्णांवर तेथेच उपचार व्हावे, यासाठी तज्ज्ञ डॉक्टर, स्त्री रोगतज्ज्ञ तसेच अन्य रिक्त पदे भरण्यासाठी आमदार राणे यांनी प्रयत्न करावे.
शिवसेना पदाधिकाऱ्यांनी घेतलेल्या आढाव्यामध्ये ग्रामीण रुग्णालयास आवश्यक औषध साठा उपलब्ध होत नसल्याचे दिसून आले. त्यामुळे शासनाकडून मंजूर होणारा औषधसाठा ग्रामीण रुग्णालयासह ग्रामीण भागातील प्राथमिक आरोग्य केंद्रांनाही तो कसा उपलब्ध होईल, यासाठी आमदार राणे यांनी प्रयत्न करावेत. केवळ अत्यावश्यक सुविधा पुरवू, असे सांगून आमदारांनी तसेच त्यांच्या सहकारी पदाधिकाऱ्यांनी जनतेची दिशाभूल करू नये, असेही म्हाडगूत यांनी पत्रकात म्हटले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.