-चित्र-शिल्प अभ्यासक्रमात मोठा बदल

चित्रशिल्प अभ्यासक्रमात मोठा बदल
दहावी उत्तीर्ण विद्यार्थ्यांना संधी; दोन्ही विभाग चारऐवजी तीन वर्षाचे
सकाळ वृत्तसेवा
संगमेश्वर, ता. १४ः कोकणातील सावर्डे येथील सह्याद्री स्कूल ऑफ आर्ट या चित्रशिल्प महाविद्यालयास महाराष्ट्र राज्य कलाशिक्षण मंडळाची अधिकृत संलग्नता प्राप्त झाली आहे. या संलग्नतेच्या पार्श्वभूमीवर संस्थेच्या अभ्यासक्रमात महत्त्वपूर्ण बदल करण्यात आले आहेत. संस्थेतील चित्रकला व शिल्पकला हे दोन्ही विभाग पूर्वी चार वर्षांचे असताना आता ते तीन वर्षांचे करण्यात आले आहेत. या निर्णयामुळे अभ्यासक्रम अधिक संक्षिप्त, प्रभावी आणि व्यावहारिक कौशल्यावर आधारित होणार असल्याचे संस्थेचे प्राचार्य प्रा. माणिक यादव यांनी सांगितले.
यासोबतच, यापूर्वी केवळ मूलभूत अभ्यासक्रम उत्तीर्ण विद्यार्थ्यांनाच प्रवेश देता येत होता; मात्र आता नव्या प्रणालीनुसार, १०वी उत्तीर्ण विद्यार्थ्यांनाही चित्रकला व शिल्पकला विभागात थेट प्रवेश घेता येणार आहे. त्यामुळे लहान वयातच कलाक्षेत्रात करिअर घडवण्याची संधी विद्यार्थ्यांना मिळणार आहे. मूलभूत अभ्यासक्रम या एक वर्षाच्या सर्टिफिकेट कोर्ससाठी ज्या विद्यार्थ्यांना सीईटी परीक्षा द्यायची आहे तसेच हौशी कलाकार यांच्यासाठी हा कोर्स ठेवण्यात आलेला आहे तसेच बारावी उत्तीर्ण विद्यार्थ्यांना कलाशिक्षक पदविका या अभ्यासक्रमात प्रवेश घेऊन कलाशिक्षक होण्याची सुवर्णंसंधी मिळणार आहे. शासनाच्या नवीन धोरणानुसार, कलाशिक्षक पदविका उत्तीर्ण विद्यार्थ्यांना उच्च माध्यमिक शाळेत अंशकालीन तत्त्वावर नोकरी करता येणार आहे.
----
दर सहा महिन्यानी मूल्यांकन
अभ्यासक्रमात आणखी एक महत्त्वाचा बदल म्हणजे आतापर्यंत अंमलात असलेली वार्षिक परीक्षा पद्धत रद्द करून दर सहामाहीस मूल्यांकन होणार आहे. त्यामुळे विद्यार्थ्यांना अधिक सुसंगत व सातत्यपूर्ण मार्गदर्शन मिळेल आणि त्यांचे सर्वांगीण मूल्यांकन करता येईल.