चिपळूणच्या ब्राह्मण संघात नर्मदा परिक्रमा मुलाखत

चिपळूणच्या ब्राह्मण संघात
नर्मदा परिक्रमा मुलाखत
चिपळूण, ता. १५ : शहरातील विशाखा चितळे आणि मानसी जोशी या दोघींनी काही महिन्यांपूर्वी पायी नर्मदा प्रदक्षिणा पूर्ण केली. त्यांचा सन्मान आणि त्यांचे अनुभव कथन असा कार्यक्रम चिपळूणच्या ब्राह्मण सहाय्यक संघाने केला.
येथील ब्राह्मण सहाय्यक संघाच्या सभागृहात झालेल्या कार्यक्रमात चितळे आणि जोशी यांची ओटी भरून त्यांना सन्मानित करण्यात आले. संघाच्या महिला विभाग अध्यक्ष सुरंगा अभ्यंकर आणि संघाच्या संचालक सदस्य रेखा बापट यांनी त्यांना सन्मानित केले. धनंजय चितळे यांना संघाचे अध्यक्ष अविनाश पोंक्षे यांनी सन्मानित केले.
मुलाखतीच्या आरंभी चितळे यांनी नर्मदा परिक्रमा का आणि कशी करतात? ते वर्णन केले, नदीचा प्रवाह उजवीकडे ठेवून ही प्रदक्षिणा करतात, हे सांगितले. मग दोघींनी आपल्या परिक्रमेदरम्यान आलेले अनुभव कथन केले. काही चमत्कारासारखेही अनुभव आले. चितळे त्यांना विविध प्रश्न विचारून अनुभवकथनाला दिशा देत होते. चिपळूणमध्ये राहणारे प्रकाश काळे यांनी गतवर्षी पायी नर्मदा परिक्रमा केली होती. त्यांनाही निमंत्रित केले होते आणि त्यांचाही सन्मान संघाचे संचालक संजय जोशी यांच्या हस्ते करण्यात आला. सुमारे दीड तास अनुभव कथन केल्यावर मुलाखातीला पूर्णविराम दिला. कार्याध्यक्ष डॉ. मेहेंदळे यांनी आभार प्रदर्शन केले.