बियाणे विक्री करणाऱ्या चार दुकानांवर बंदी

बियाणे विक्री करणाऱ्या चार दुकानांवर बंदी
जिल्हा कृषी अधिकारी ; चाळीस दुकानांची विभागाकडून तपासणी
सकाळ वृत्तसेवा
रत्नागिरी, ता. १५ ः जिल्ह्यातील काही दुकानदारांनी शेतकऱ्यांना चांगल्या दर्जाची बियाणी विक्री करत नसल्यामुळे कृषी विभागाच्यावतीने कारवाईचा बडगा उचलण्यास सुरवात झाली आहे. जिल्ह्यातील ४ दुकानांना १ लाख १२ हजार ६४ रुपये किमतीच्या बियाणे विक्री करण्यास बंद घातली आहे. ७१६ किलो बियाण्यांची विक्री थांबविण्यात आली आहे. त्यामुळे बियाणे, खते विक्री दुकानदारांचे धाबे दणाणले आहेत.
रत्नागिरीत मान्सून पावसाने दमदार हजेरी लावली आहे. त्यामुळे कोकणातील शेतकऱ्यांनी भात, नाचणीच्या शेतीसाठी नागरणी, पेरणीची लगबग सुरु केली आहे. शेतकऱ्यांना चांगल्या दर्जाचे बियाणे खत मिळावे म्हणून कृषी विभागाने बैठक घेवून सूचनाही देण्यात आल्या होत्या. चांगल्या दर्जाच्या बियाण्याची विक्री होत नसल्यास तालुका तक्रार निवारण समिती, जिल्हा स्तरावरील हेल्पलाईन नंबरवार संपर्क साधण्याचे आवाहन करण्यात आले होते. खरीप हंगामाच्या पार्श्वभूमीवर जिल्हापरिषदेच्या कृषी विभागाने जिल्ह्यातील तब्बल ४० हून अधिक दुकानांची तपासणी केली. यामध्ये आक्षेपार्ह असे काही सापडले नाही. त्यामुळे कोणत्याही दुकानांवर कारवाई झाली नाही. तर जिल्हा अधिक्षक कृषी विभागातर्फे तालुका शहरातील खते, बियाण्याच्या दुकांनांची तपासणी करण्यात आली. यामध्ये चार दुकानदारांनी नियमांचे पालन न केल्यामुळे चार दुकानदारावर बियाणे विक्री करण्यास बंदी आदेश देण्यात आले आहेत.
जिल्ह्यात बियाणे, खत पुरवठा सुरळीत झालेला आहे. शेतकऱ्यांनी कृषी सेवा केंद्रामधून आवश्यक कृषी निविष्ठांची खरेदी करुन ठेवावी तसेच बियाणे, खते व किटनाशके खरेदीचे पक्के बील घ्यावे निविष्ठा वापर करताना सुरक्षा उपायांचे काटेकोर पालन करावे तसेच निविष्ठांबाबत काही तक्रारी असल्यास संपर्क साधावे, असे आवाहन कृषी विभागाच्यावतीने केले आहे.

कोट
जिल्हा परिषद कृषी विभाग, जिल्हा अधिक्षक कृषी विभागाने जिल्ह्यातील बियाणे, खत विक्री दुकानांची तपासणी सुरु केली आहे. काही दुकानात चांगल्या दर्जाचे बियाणे विक्री केले जात आहे. काही दुकानांत दिलेल्या सूचनांचे पालन न करता बियाण्यांची विक्री केल्यामुळे अशा दुकानांवर कारवाई केली जात आहे.
- शिवकुमार सदाफुले, जिल्हा अधिक्षक कृषी अधिकारी