निवृत्तीवेतनाकडे दुर्लक्ष केल्यास तीव्र आंदोलन

निवृत्तीवेतनाकडे दुर्लक्ष
केल्यास तीव्र आंदोलन

निवृत्त शिक्षकांचा प्रशासनाला इशारा

सकाळ वृत्तसेवा
सिंधुदुर्गनगरी, ता. १६ ः निवृत्त प्राथमिक शिक्षकांना जून संपत आला तरी मे महिन्याचे निवृत्तीवेतन अद्याप मिळाले नाही. याबाबत तीव्र नाराजी व्यक्त करत निवृत्त प्राथमिक शिक्षक असोसिएशनच्यावतीने मुख्य कार्यकारी अधिकारी यांना निवेदन देत त्यांचे लक्ष वेधले. जूनचे निवृत्तीवेतन तत्काळ द्या. तसेच जुलैचे निवृत्तीवेतन ४ तारखेपूर्वी न मिळाल्यास ६ जुलैला उपोषण केले जाईल, असा इशारा निवेदनातून दिला आहे.
सिंधुदुर्ग जिल्ह्यात निवृत्त प्राथमिक शिक्षकांचे मे २०२५ चे निवृत्तीवेतन अद्याप मिळालेले नाही. यामुळे निवृत्त शिक्षकांमध्ये तीव्र नाराजी आहे. आज जिल्ह्यातील निवृत्त प्राथमिक शिक्षक असोसिएशनचे जिल्हाध्यक्ष सावळाराम अणावकर यांच्या नेतृत्वाखाली पदाधिकाऱ्यांनी मुख्य कार्यकारी अधिकाऱ्यांची भेट घेण्याचे निश्चित केले. मात्र, त्यांची भेट होऊ शकली नाही. तसेच अन्य जबाबदार अधिकारी कार्यालयात उपस्थित नव्हते. त्यामुळे निवृत्त शिक्षकांनी तीव्र नाराजी व्यक्त करत प्रशासनामध्ये निवृत्त शिक्षकांबाबत उदासीनता असल्याचे दिसून आले. याबाबत त्यांनी निषेध व्यक्त केला. मे महिन्याचे निवृत्तीवेतन देण्यास प्रशासनाकडून वेळकाढू धोरण अवलंबिले जात असून, यामध्ये सुधारणा करावी व मेचे निवृत्ती वेतन तत्काळ द्यावे. तसेच जुलैचे वेतन ४ तारखेपूर्वी न मिळाल्यास ६ ला आपल्या कार्यालयासमोर उपोषणास बसावे लागेल, असा इशारा दिला आहे. यावेळी सेवानिवृत्त प्राथमिक शिक्षक असोसिएशनचे अध्यक्ष अणावकर, उपाध्यक्ष प्रकाश दळवी, जिल्हा सचिव सुंदर पारकर यांच्यासह सर्व तालुक्यांचे पदाधिकारी व निवृत्त शिक्षक उपस्थित होते.